فڕۆكه جه‌نگییه‌كانی ڕووسییه ڕۆژی دووشه‌ممه ٥ی گه‌ڵارێزان، چه‌ندین بنكه‌ی نیزامی یه‌كێك له گرووپه نه‌یاره‌كانی ڕژیمی به‌شار ئه‌سه‌دیان له ده‌ورووبه‌ری باكووری ئێدله‌ب بۆردوومان كرد و به‌هۆیه‌وه ٧٨ كه‌س گیانیان له‌ده‌ستدا و به ده‌یان كه‌سی دیكه‌ش برینداربوون.
به‌وته‌ی گرووپی “فه‌لقولشام”، فڕۆكه جه‌نگییه‌كانی ڕووسییه بنكه‌كانی ئه‌م گرووپه‌یان له نزیكی سنووری توركییه كردووه‌ته ئامانج. شایانی باسه، ئه‌م كه‌سان له بنكه‌یه‌كی نیزامی له نزیك سنووری توركییه سه‌رقاڵی بارهێنان بوون. جێگه‌ی ئاماژه‌یه، “ویلادمیری پووتین” سه‌رۆك كۆماری ڕووسییه له مانگی مارس له‌سه‌ر ئاگربه‌س له ناوچه‌ی ئێدله‌ب له‌گه‌ڵ “ڕه‌جه‌ب ته‌ئێب ئه‌ردۆغان” ڕێككه‌وتبوو. له‌وكاته‌وه هه‌تا ئێستا چه‌ندین جار تێكهه‌ڵچوونی پڕژوبڵاو ڕوویداوه، به‌ڵام هێرشێكی له‌م چه‌شنه ڕووی نه‌دابوو. ئه‌مه له‌كاتێكدایه كه ده‌وڵه‌تی ڕووسییه و توركییه سه‌باره‌ت به‌م ته‌وه‌ره بێده‌نگیان هه‌ڵبژاردووه.