“لوقمان قادری” زیندانی سیاسی به‌ندكراو له زیندانی نه‌غه‌ده له ماوه‌ی چه‌ند حه‌فته‌ی ڕابردوو چه‌ندین جار له‌لایه‌ن هێزه‌كانی ئیتلاعاتی ورمێ ئه‌شكه‌نجه و ئازاری جه‌سته‌یی و ده‌روونی دراوه و ڕاسته‌وخۆی هه‌ڕه‌شه‌ی كوشتنیان لێ كردووه.
ڕۆژی پێنجشه‌ممه ٢٩ی مانگی ڕه‌زبه‌ری ١٤٠٠ هێزه‌كانی حكوومه‌ت “لوقمان قادری”یان له جاده‌ی پیرانشار بۆ گوندی “پسوێ” ده‌ستبه‌سه‌ر كرد. ناوبراو پاش لێپرسینه‌وه له گرتووخانه‌ی ئیتلاعاتی ورمێ بۆ زیندانی نه‌غه‌ده گوازرایه‌وه و له ده‌ستڕاگه‌یشتن به پارێزه‌ر و چاوپێكه‌وتن له‌گه‌ڵ بنه‌ماڵه‌ی بێبه‌ش كرا. ئه‌و چالاكه سیاسیه له‌لایه‌ن لقی ١٠٢ی دادگای ئینقلابی پیرانشار به تۆمه‌تی “هاوكاری له‌گه‌ڵ یه‌كێك له‌حیزبه نه‌یاره‌كانی ڕژیم” به دوو ساڵ و حه‌وت مانگ و ١٦ ڕۆژ زیندانی ته‌عزیری مه‌حكووم كرا. به‌پێی زانیارییه‌كان، هێزه‌كانی ئیتلاعاتی ورمێ چه‌ند جار ئه‌و به‌ندكراوه‌یان بۆ شوێنێكی نادیار گواستۆته‌وه و له‌وێ ئه‌شكه‌نجه و ئازاری جه‌سته‌یی و ده‌روونیان داوه و به شێوه‌ی ساخته تیربارانیان كردووه.