ڕاپۆرته‌كان باس له‌وه ده‌كه‌ن كه سه‌رله به‌یانی ڕۆژی هه‌ینی ٢٨ی خه‌رمانان، “سۆهه‌یل عه‌ره‌بی” به‌ندكراوی سیاسی له به‌ندی ٥ی زیندانی فه‌شافوویه‌ی تاران، له لایه‌ن به‌رپرسانی ئه‌م زیندانه‌وه بانگهێشت و بۆ شوێنێكی نادیار گوازراوه‌ته‌وه.
به پێی ئه‌م ڕاپۆرته، به‌رپرسانی زیندان به‌دوای سه‌ردانی به‌ندی ٥ و به بێ هیچ شی كردنه‌وه‌یه‌ك، “سۆهه‌یل عه‌ره‌بی”یان ڕاگوازتووه و هه‌تا كاتی داڕشتنی ئه‌م هه‌واڵه ناوبراو نه‌گه‌ڕێندراوه‌ته‌وه بۆ زیندان و ئه‌مه‌ش نیگه‌رانی بنه‌ماڵه‌ی سۆهه‌یلی لێكه‌وتووه‌ته‌وه. شایانی باسه، “سۆهه‌یل عه‌ره‌بی” ماوه‌یه‌ك له‌مه‌وبه‌ر له پێوه‌ندییه‌كی ته‌له‌فوونی له‌گه‌ڵ كاناڵی ئاسمانی “بی بی سی”، سه‌باره‌ت به‌ر بارودۆخی ناله‌باری ناو زیندان و به‌ندكراوان قسه‌ی كردبوو و پێ ده‌چێت ڕاگوێزرانی ناوبراو به‌م مه‌به‌سته بووبێت و له‌دژی په‌روه‌نده‌یه‌كی نوێ كرابێته‌وه.