كرێكارانی دامه‌زراوه‌ی هه‌فت ته‌په، ڕۆژی سێشه‌ممه ٤ی خه‌رمانان بۆ ٧٣مین ڕۆژی به‌رده‌وام له به‌رامبه‌ر فه‌رمانداریی شووش سه‌ره‌ڕای كه‌مپینی لایه‌نه جۆراوجۆره‌كانی ده‌سه‌ڵات و هه‌ر سێ ناوه‌ندی، قه‌زایی، مۆقه‌ننه‌نه و مۆجرییه بۆ كۆتایی هێنان به ناڕه‌زایه‌تیی ئه‌م كرێكارانه، ده‌ستیاندایه كۆبوونه‌وه.
ناڕازییان ڕایانگه‌یاندووه: ئه‌گه‌ر كاربه‌ده‌ستان له‌گه‌ڵ سێ خواسته‌ی سه‌ره‌كی ئه‌وانه واته، “په‌رداخت كردنی حه‌قده‌ستی مانگه‌كانی پووشپه‌ڕ و گه‌لاوێژ تا كۆتایی ئه‌م حه‌فته‌یه، په‌رداخت كردنی حه‌قده‌سته‌كان له‌سه‌ر وه‌ختی خۆی و تازه كردنه‌وه‌ی ده‌فته‌رچه‌ی بیمه‌كانیان تا كۆتایی ئه‌م حه‌فته‌یه و هه‌روه‌ها درێژ كردنه‌وه‌ی قه‌راردادی كرێكارانی وه‌رزی “قامیش بڕ” و گه‌ڕانه‌وه‌ی هاوكاره‌كانیان بۆ سه‌ر كار” ڕه‌زامه‌ندی ده‌رببڕن، ئه‌وه به شێوه‌ی كاتی ده‌گه‌ڕێنه‌وه سه‌ر كاره‌كانیان و كۆتایی به مانگرتنه‌كه‌یان دێنن. ناڕازییان هه‌روه‌ها ڕایانگه‌یاندووه: سه‌باره‌ت به چلۆنایه‌تی درێژه دان به ناڕه‌زایه‌تییه‌كه‌یان به‌مه‌به‌ستی گه‌یشتن به خواسته‌كانیان له‌وانه، “هه‌ڵوه‌شانه‌وه‌ی خسووسی سازی و گه‌ڕانه‌وه‌ی سه‌رجه‌م هاوكاره‌كانیان بۆ سه‌ر كار، خۆیان بڕیار ده‌ده‌ن.