لە ڕۆژانی ڕابردوودا دوو زیندانی نه‌خۆش لە زیندانەكانی دەوڵەتى تورکیه بەشێوەی گوماناوی گیانیان لەدەستداوە و بەو پێیەش لەماوەی هەشت مانگی رابردوودا ٤٣ زیندانی نەخۆش، كە لە نێویاندا ئەو زیندانیانەش هەن، كە ڕێگری لە ئازادكردنیان كراوە، گیانیان لەدەستداوە.
لەزیندانەكانی توركیادا گیان لەدەستدانی به‌ندكراوانی نەخۆش و ئەو زیندانیانەشی، كە ماوەی سزاكەیان تەواو بووە و ئازاد ناكرێن، بووەتە دیاردە، بەجۆرێک لە هەشت مانگی ڕابردوودا ٤٣ زیندانی نەخۆش لەناو زیندانەکاندا گیانیان لەدەستداوە. به‌پێی ڕاپۆرتی ئاژانسی هاوارنیووز، هەزار و ٥١٧ زیندانی نەخۆش، كە دۆخی تەندروستی ٦٥١ كەسیان سەختە بەهۆی ڕاپۆرتی پزیشكی دادەوە ئازاد ناكرێن و ڕووبەڕووی مردن كراونەتەوە.