ڕۆژی یه‌كشه‌ممه ٢٩ی مانگی خه‌زه‌ڵوه‌ر، لەگەڵ دەستپێکردنی دەیەم هەفتەی خۆپیشاندان و ڕاپه‌ڕین له ئێران، جارێکیتر لە شارێکی ڕۆژهەڵاتی کوردستان، ژمارەیەک خۆپیشاندەر گیانیان لەدەستدا و لە بەشێکی زۆری زانکۆکانیش ناڕەزایەتی بەردەوام بووه.
به‌پێی ڕاپۆرته‌كان، دوێنێ له شارەکانی “سنە”، “مهاباد”، “بۆکان”، “خۆی”، “شنۆ”، “پیرانشار”، “سەردەشت”، “سەقز”، “دیواندەرە”، “مەریوان”، “قوروە”، “کامیاران”، “سەحنە”، “پاوە”،” ئیلام”، “ئابدانان”، و زۆرشاری دیکە، خۆپیشاندان و كۆبوونه‌وه‌ی ناڕه‌زایه‌تی بەڕێوەچوو. لە شاری دیواندەرە هێزە ئەمنییەکان تەقەی ڕاسته‌وخۆیان لە خۆپیشاندەران کرد و بەپێی چەند سەرچاوەیەک، لانیکەم پێنج خۆپیشاندەر گیانیان لەدەستداوە و دەیان كه‌سی دیکەش برینداربوون. هه‌روه‌ها لەشاری مه‌هاباد ژمارەیەکی بەرچاو لە هاووڵاتیانی شارەکە بەشدارییان لە ڕێوڕه‌سمی ناشتنی ته‌رمی، “کەمال ئەحمەد پور”دا کرد، کە لە خۆپیشاندانەکانی ڕۆژی هەینی گیانی لەدەستدابوو و دواتر ڕێوڕه‌سمه‌كه بۆ خۆپیشاندان و ناڕەزایەتی دژبه كۆماری ئیسلامی گۆڕدرا. شایانی باسه لە شاری سنە هێزە سه‌كوتگه‌ره‌كانی كۆماری ئیسلامی هێرشیان کردە سەر خوێندکارانی زانکۆی ئەو شارە و ڕووبەڕووبوونەوەی توند هاتە ئاراوە. لەسەر ئاستی ئێرانیش لە دەیان زانکۆ مانگرتن و كۆبوونه‌وه‌ی ناڕه‌زایه‌تی بەڕێوەچوو، بەتایبەتی لە شاره‌كانی تاران، مەشهەد، ئێسفەهان، تەورێز، شیراز، ئەهواز و چەند شارێکی تر. هاوکات، لەشارەکانی تاران، شیراز، ئێسفەهان و زاهیدان، هه‌وه‌ها دووکاندار و کاسباکارانی زۆربەی شارەکانی کوردستان ئەمڕۆ یەکشەممە، بە نیشانەی ناڕەزایەتی بە توندوتیژیی لەڕادەبەدەری هێزە سه‌ركوتگه‌ره‌كانی کۆماری ئیسلامی لە کوردستان، لە مانگرتندانێکی بەریندان.