بەپێی هەواڵی گەییشتوو، ١٩ موعەلیمی دەستبەسەرکراوی شاری سەقز کە لە ماوەی دوو ڕۆژی ڕابردوودا لە لایەن هێزەئەمنییەکانی ئەو شارەوە دەستبەسەرکرابوون، لە ژێر گوشاری ئیدارەی ئیتلاعاتی سنە بۆ زیندانی ناوەندیی سەقز گوازراونەتەوە.
بەپێی ڕاپۆرتەکان، ڕۆژانی چوارشەممە و پێنجشەممەی حەفتەی ڕابردوو لانیکەم ٢٠ موعەلیم کە ئەندامی ئەنجوومەنی پیشەیی موعەلیمانی کوردستان لقی سەقز و زێویە بوون لەلایەن ئیدارەی ئیتلاعاتی سەقزەوە دەستبەسەر کراون. جێگای ئاماژەیە ڕۆژی پێنجشەممە دادیاری لقی ٧ی دادگای سەقز بە هۆی ئەو گوشارانەی کە لەلایەن ئیتلاعاتی سنەوە لە سەری بووە ڕێگری کردووە لە ئازادی کاتیی ئەو موعەلیمانە و بەبێ هەبوونی هیچ تاوانێک بڕیاری زیندانی کردنی بۆ دەرکردوون. بەپێی هەواڵێکی دیکە، هێزەکانی ئیدارەی ئیتلاعاتی سەقز کاتژمێر ٣٠ خولەکی بەرەبەیانی ڕۆژی هەینی ٢٧ی جۆزەردان، هەڵیانکوتاوەتە سەر ماڵی “موحسین شکووهی” موعەلیمی خانەنشینکراو و دەستبەسەریان کردووە.