عەلی خامنەیی رۆژی ١ی خاکەلێوەی ساڵی ١٣٩٤ دوو سوخەنڕانی کرد. ئەو لە سوخەنڕانی یەکەمدا، کە بە بۆنەی هاتنی ساڵی نوێوە بوو، دروشمی ساڵی ٩٤ و ئامانجەکانی رژیمی ئیسلامی لەمساڵدا دەربڕی و لە دووهەمیشیاندا چۆنیه‌تی دەستەبەر بوونیانی باس کرد. خامنەیی لە سوخەنڕانی یەکەمدا لە زومرەی ئاواتە بەرزەکانی ئاماژەی بە پێویستی گەشە و بەرەوپێش چوونی ئابووری کرد و بۆ ئەم مەبەستەش دروشمی ئەمساڵی رژیمی “دەوڵەت و میللەت، هاودڵی و هاوزمانی”، دیاری کرد. ئەو لە سوخەنڕانی دووهەمدا، کە لە مەشهەد به‌ڕێوه‌ی برد، لە روانگەی خۆیەوە رێگای گەیشتن بەم ئامانجانەی رەسم کرد. خامنەیی لەم سوخەنرانیەدا تێكیه‌کەلامی لەسەر ئابووری و وتووێژه هەستەییه‌كان دانا و داوای بەناو هاوکاری خەڵک و دەوڵەتی لەم بوارەدا کرد. راستیەکەی ئەوەیە کە لە روانگەی ئابووریەوە ده‌خاڵەتی نیزامی ئێران لە عێراق و سوریە و یەمەن بارێکی قورسە بەسەر شانی ئابووری لاواز و شپرزەی کۆماری ئیسلامیەوە و تا ئەو جێگایەی پێوەندی بە یارمەتی تەسلیحاتیەوە هەیە، قازانجەکەی راستەوخۆ دەچێتە گیرفانی کۆمپانیاکانی بەرهەمهێنانی چەک لە روسیە و ئامریکاوە و درێژەی ئەم ده‌خاڵەتانە بەبێ پشت بەستن بە بونیەیەکی ئابووری بەهێز لەنێوخۆی وڵاتدا مومکین نییە.
ئابووری ئێران بەبێ ئەم خەرجانەش، قەیراناویە و لە بونبەستدایە، چ بگات بەوەیکە هه‌زینه‌یه‌كی ئاوا کەڵانیشی تووش بێت. خامنەیی بە باشی دەزانێت کە درێژه‌ی ئەم بارودۆخە، کاسەی سەبری خەڵک پڕ دەکات و ئەوان له‌نێوچوونی خۆیان لە ئاخێزی خەڵکی وەگیان هاتوودا دەبینن. لەم رووەوە پشت بەستنی خامنەیی لە سوخەنڕانیە نوێیه‌كه‌یدا بە ئابووری شیاوی هەست پێکردنە و بەم هۆیەشەوەیە کە داوای دەرفەت لەخەڵک دەکات تا بەوتەی ئەو لە “هاودڵی لەگەڵ دەوڵەتدا”، ئەم دەرفەتە بدەن و “زاری” ناڕەزایەتی نەکەنەوە.ئەوەیکە ئابووری قەیراناوی کۆماری ئیسلامی گەیشتۆتە قۆناغیکی مەترسیدار لە لایەن خودی کاربەدستانی جۆراوجۆری پلە بەرزیشەوە، حاشای لێناکرێت. ئەوان خۆیان دەزانن کە بە خۆش بینانەترین هه‌ڵسه‌نگاندنه‌كان، ٧٠ لەسەدی بەرهەمهێنان لەکار کەوتووە و تەنیا سی لەسەدی چالاکە، ئەویش زۆرتر پێوەندە بە بەرهەمهێنانی نەوت و مادەی خاوی پێتروشیمی. ئێستا خامنەیی دەیەوێ بە ئابووریەکی بەناو مقاومەتی، کە پشتی بە بەرهەمهێنانی نێوخۆی و بەرگرتن لە خام فرۆشیە، ئەم ئابووریە نیوە گیانە بخاتەوە سەرپێ. ئەو تەوسیە دەکات کە ئابووری پشت بە نەوت نەبەستێت. هەڵبەت ئەمە سیاسەتێکە کە لانیکەم لە دەورەی میللی کرانی پیشەسازی نەوت لە ساڵی ١٣٢٩ و دواتر لە ساڵەکانی سەرەتای دوای رووخانی رژیمی “شا”دا، لەلایەن سەرانی رژیمی شا و رژیمی ئیسلامیەوە دەربڕدراوە و بەجێگایەکیش نەگەیشتووە.بەڵام هەمووان و لەوانە خودی خامنەیی دەزانێت کە لە سەردەمی ئابووری قەیران لێدراوی بازاڕی ئازاد و لە بارودۆخێکدا کە هەموو رەوتە سەرەکیەکانی ئابووری لەلایەن دەوڵەتانی گەشە کردوو گەورەی سەرمایەداریەوە و لە رێگای بانکی جیهانی، سندوقی نێونەتەوەیی دراو و سازمانی تجارەتی جیهانیەوە رێكده‌خرێت، جێگایەک بۆ ئابووری پشت بەستو بەخۆی، نێوخۆیی و بەناو مقاومەتی بوونی نییە و بونبەستی ئابووری رژیم راست لێرەدایە. بەم هۆیەوە سەرەڕای مەیلی خامنەیی و فەرماندەکانی سپا کە دەسەڵاتداری سەرەکین، رژیم سەرئەنجام ناچار دەبێت لە مەسایلی هەستەیی و دەسەڵاتی ناوچەییدا بە بەشێکی کەم رازی بێت کە زۆرتر لایەن ئامریکاوە بۆی دیاری دەکرێت.دەوڵەتی رۆحانیش کە پشتیوانیی ژمارەیەک لە بونگا و سەرمایەدارانی کەرتی تایبەت شک دەبات، لە هەوڵی قەبوڵاندنی ئەم راستیەدایە بە کەسانی نیگەرانی ئەم چینە و بەشێک لە فەرماندەکانی سپا کە قازانجی زۆریان لەم گەمارۆیانە دەست دەکەوێ و ساڵانە تا ٢٥ ملیارد دۆلار کالای قاچاغ هاوردەی ئێران دەکەن. لەم رووەوە دروشمی “هاودڵی و هاو زمانی دەوڵەت و میللەت”، لە هەماحاڵدا قسەی دڵی رۆحانیشە کە لە زمان خامنەییەوە بەیان دەکرێت. مخاتبینی خامنەیی لە دانی ئەم دروشمەدا نەک زۆربەی خەڵکی ئێران، بەڵکوو سەرمایەداران و کەسانی نیگەران سەبارەت بە چارەنووسی کۆماری ئیسلامین. ئەوانن کە خامنەیی بانگهێشتیان دەکات بۆ هاودڵی و هاوزمانی لەگەڵ دەوڵەت. لە راستیدا بۆ کرێکاران و زەحمەتکێشانێک کە مەرگی رژیم ئاواتیانە، شتێک بەناوی “هاودڵی و هاو زمانی لەگەڵ دەوڵەت” نییە. بەم هۆیەوە رژیم هەر بەوجۆرەی کە گەلێک جار نیشانی داوە، هێزە سەرکوتگەرە گەندەڵەکانی لە بەرانبەر خەڵکدا راگرتووە.بەڵام خامنەیی کە دەزانێ قسەی کۆتایی لە چارەسەر كردنی مەسائێلی هەستەیی و ناوچەیدا لەگەڵ ئامریکا نەک لەلایەن ئەوەوە بەڵکوو لەلایەن ستادی سیاسی سپاوە و لەوانە کەسانی نیگەرانی بەهێزەوە دەکرێت، رێگایەک بۆ دەرباز بوونی خۆی لە رۆژی مەبادا دا دەهێڵێتەوە. ئەو لە سوخەنڕانی دووهەمیدا وتی کە لە وتووێژ لەگەڵ ئامریکادا چەکی سپیمان بە دەوڵەتی رۆحانی نەداوە و نایدەین.پرسیارێک کە بۆ کرێکاران و خەڵکی بێبەش و زەحمەتکێش دێتە ئاراوە ئەوەیە کە ئەگەر هەموو شەرتەکانی ئامریکا و باقی وڵاتانی ١+٥ یش قەبوڵ بکات بەوشێوەی کە دەوڵەتی رۆحانی و پشتیوانەکانی نیشانی ئەدەن، سەرمایەی کەڵان و تێکنولۆژی پێشکەوتوو دەڕژێنە مەیدانی نەوت و گاز و پێتروشیمی و باقی پیشەسازی و مەعادنی کلیدی ئێرانەوە؟ ئایا لە ئاکامیدا بەملیۆن هەلی کار دەڕەخسێت و کێشە و گرفتی کرێکاران و خەڵک بەشێوەیەکی بەرچاو کەم دەبێتەوە؟ ولامەکەی بێ گومان مەنفیە. تەنانەت ئەگەر رژیم نەکەوێتە بەر مەنگەنەی خەباتی کرێکاران و خەڵکی دژیی ئیستبداد و نەیارانی نێوخۆیی سازش لەگەڵ ئامریکاش و لەم بوارەدا مەیدان بۆ دەوڵەتی رۆحانی خاڵی بکەن و سازشەکە رەسمیەت بەدەست بێنێ، تازە ئەوکاتە ناوەندە ماڵیە دەوڵەمەندە جیهانی و کەڵانی سەرمایەگوزاران لەدڵی ئابووری قەیران لێدراوی ئێستای جیهاندا لە ئێران، بەرەوڕووی گرفتی ئابووریەکی مافیایی و شپرزە دەبنەوە کە ٨٠ تا ٩٠ لەسەدی لە ئیختیار دەوڵەت، سپا و باقی هێزە نیزامی و ئەمنیەتیەکان دایە.بە پێچه‌وانەی ئاوات و دروشمەکانی خامنەیی بوار بۆ رزگار کردنی ئابووری شپرزەی ئێران و روبەنا گەندەڵەکەی، بەتایبەت لە ناخی قەیرانی ئێستای جیهانی سەرمایەداریدا، نەتەنیا لەبار نییە، بەڵکوو زەمینە زیاتر بۆ لێکهەڵوەشانی ئەم ئابووریە لەبارە. بەڵام خێرایی و ماوەی ئەم لێکهەڵوەشانە و رووخانی کۆماری ئیسلامی لەپێش هەموو شتێکدا بەستراوەتەوە بە هۆکاری وشیاری، رێکخراویی و رەزمەندەگی چینی کرێکار و هاتنە مەیدانی هەموو ئەو خەڵکەی کە لە ده‌سه‌ڵاتداریه‌تی ئەم رژیمە وەگیان هاتوون.