ڕۆژی ڕابردوو، “مای ساتۆ” ڕاپۆرتنێری تایبەتی مافی مرۆڤ لە ئێران، هۆشدارییەکی توندی سەبارەت بە بەرزبوونەوەی ڕێژەی لەسێدارەدانی هاووڵاتیان و سەرکوتکردنی کەمینە نەتەوەییەکان بەتایبەت کورد و بەلووچەکان بڵاو کردەوە.
لە بەیانناممەکەدا ئاماژە بەوە کراوە کە تەنیا لە ساڵی ٢٠٢٦دا لانیکەم ٢٤ هاووڵاتیی بەلووچ و ٢٢ هاووڵاتیی کورد لەسێدارە دراون و ژمارەیەکی زۆری دیکەش مەترسی سێدارەیان لەسەرە. ڕاپۆرتەکە ئاماژە بەوە دەکات کە یاسای ساڵی ٢٠٢٥ سەبارەت بە هاوکاری لەگەڵ ناوەندە ئەمنیەکانی وڵاتانی دژبەری ڕژیم و تاوانە ئەمنییەکان، بووەتە ئامرازێک بۆ سەرکوتکردنی سیستماتیکی ناڕەزایەتییەکان و سەپاندنی تۆمەتی “محارەبە” و “بەغی” بەسەر چالاکاندا. لەم بەیاننامەیەدا بەپەلە داوای هەڵوەشاندنەوەی سزای سێدارەی چوار بەندکراوی کورد بە ناوەکانی “یوسف ئەحمەدی“، “ڕەئووف شێخ مەعرووف“، “محەممەد فەرەجی” و “موحسین ئیسلامخا” و بەندکراوێکی بەلووچ بە ناوی “فەرهاد بەرانزەهی” کراوە کە لەژێر ئەشکەنجەدا دانپێدانانی زۆرەملێیان لێ وەرگیراوە.