بەپێی دوایین زانیارییەکان، پێگەکانی ڕژیمی کۆماری ئیسلامی لە چەندین شار و ناوچەی جیاوازی ئێران، لە ڕێگەی چەندین مووشەک و هێرشی ئاسمانییەوە، بە ئامانج گیراون.
فەرماندەیی ناوەندی ئەرتەشی ئەمریکا ناسراو ڕایگەیاند کە ئەم هێرشانە بە فەرمانی سەرۆک کۆماری ئەمریکا و بۆ سەر سیستمەکانی بەرگری کەناراوەکان و بنکەکانی کۆگا و هاوێشتنی موشەکی کرووز ئەنجامدراون تا توانایی ڕژیم بۆ هێرش بۆ سەر کەشتییە بازرگانییەکان لە “گەرووی هورموز” تێکبشکێنرێت. بەپێی ئەم ڕاپۆرتە، شەپۆلی دووهەمی هێرشەکان لە کاتژمێر ٣ی پاشنیوەڕۆ بە چڕی دەستیپێکردووە. لە کاتی ئەم هێرشانەدا، لە شاری “ئەهواز” زیاتر لە ١٥ تەقینەوەی بەهێز لە “کیانشەهر“، “لەشکەری ٩٢ی زرەیی” و سیستەمی بەرگری هەوایی “زەردەشت” بیستراون و “ئیدارەی ئیتلاعات” و “ماڵە ئەمنییەکان“ی هێزە سەرکوتگەرەکانی ڕژیم کراونەتە ئامانجو و هەروەها بەهۆی نزیکبوونی تەقینەوەکان لە “نەخۆشخانەی شەهید بەقائی“، ئەم ناوەندە تەندروستییە بە تەواوی چۆڵکراوە و هێڵی ئینتەرنێتی شاریش تووشی پچڕانی جددی بووەتەوە. هاوکات لە “چابەهار” لانیکەم سێ تەقینەوەی گەورە ڕوویداوە و وێستگە و بازگەی “ئەحمەد ڕێژە” بە تەواوی وێران بووە. هەروەها بنکەی هێزی ئاسمانی لە “کەنارک” و بارەگایەکی “سپای پاسداران” لە “مەنووجان“ی پارێزگای “کرمان” کراونەتە ئامانج. لە بەرانبەردا، ڕاپۆرتەکان ئاماژە بە هاوێشتنی چەندین موشەک لە “بنکەی موشەکیی چەمران” لە “کرماشان” و هێنانی فڕۆکە جەنگییەکانی سوپای ڕژیم بۆ ئاسمانی “تاران” دەکەن.