ڕۆژی ڕابردوو، پۆلیسی دژەتیرۆری بریتانیا ڕایگەیاند کە ژمارەی دۆسیە ئەمنییەکان بە شێوەیەکی بەرچاو زیادی کردووە و دەیان پیلانی کۆماری ئیسلامییان دژی ناڕازیان لەو وڵاتە پووچەڵ کردووەتەوە.
بەرپرسانی ئەمنیی بریتانیا لە کۆبوونەوەیەکی میدیاییدا ئاشکرایان کردووە کە بەشێکی زۆر لە سەرچاوەکانی پۆلیسی دژەتیرۆر و ئاسایشی ناوخۆ بۆ بەرەنگاربوونەوەی هەوڵەکانی تاران تەرخان کراوە. ئەوان ئاماژەیان بەوە کردووە کە لە ساڵی ٢٠٢٥ەوە تا ئێستا، زیاتر لە ٢٠ پیلان و دۆسیەی پەیوەندیدار بە کۆماری ئیسلامییەوە کە ئامانج لێیان کوشتن، ڕفاندن، هەڕەشەی جەستەیی و بەکارهێنانی میلیشیاکان بووە، لە لایەن دەزگا ئەمنییەکانی بریتانیاوە پێشیان پێگیراوە و پووچەڵ کراونەتەوە. لەم ڕاپۆرتەدا جەخت لەوەش کراوەتەوە کە ئەم وڵاتە هاوکات لەگەڵ هەڕەشەی تێرۆریزم و توندڕەویی ناوخۆیی، ڕووبەڕووی هەڕەشەی وڵاتانی نەیاری وەک ڕووسیا، چین و کۆماری ئیسلامی بووەتەوە و ڕێژەی دۆسیەکانی تایبەت بە ئاسایشی نەتەوەیی بەراورد بە ساڵی ڕابردوو لەسەدا پەنجا زیادی کردووە.