دوو به‌ندكراوی سیاسی ڕاگیراو له زیندانی لاكانی ڕه‌شت به ناوه‌كانی “حافز فه‌ڕۆحی” و “مه‌نووچێهر فه‌لاح” له ناڕه‌زایه‌تی به هه‌ڵسووكه‌وتی دژه مرۆڤانه‌ی به‌رپرسانی زیندان مانیان له خواردن گرتووه.
ئه‌و دوو به‌ندكراوه له نامه‌یێكدا ڕایانگه‌یاندووه كه یه‌كێكیان ١٩ مانگ و ئه‌وی دیكه‌یان ١٤ مانگه كه بیلاته‌كلیف له به‌ندیخانه‌ی ڕه‌شت زیندانی كراون، هێشتا هۆكاری به‌ندكرانیان ڕوون نه‌كراوه و دادستانی ڕه‌شت له‌گه‌ڵ دانانی وه‌سیقه و ئازادكردنیان دژایه‌تی ده‌كات. “حافز فه‌ڕۆحی” و “مه‌نووچێهر فه‌لاح” له نامه‌كه‌یاندا ئاماژه‌یان به نادادپه‌روه‌ری له سیسته‌می قه‌زایی كۆماری ئیسلامی دا كردووه و ڕایانگه‌یاندووه كه دژبه ئه‌و زۆڵم و سیته‌مه‌ی له حه‌قیاندا كراوه ڕێگه چاره‌یێكیان نه‌ماوه جگه له مانگرتن و له ڕۆژی دووشه‌ممه ١ی گه‌لاوێژه‌وه مانیان له خواردن گرتووه.