ڕۆژی یه‌كشه‌ممه ١ی مانگی گه‌لاوێژ، “نازیلا مه‌عرووفیان” خوێندكار و ڕۆژنامه‌نووسی خه‌ڵكی سه‌قز له گرتووخانه‌ی ئیتلاعات ناسراو به به‌ندی ٢٠٩ی زیندانی ئێڤین بۆ به‌ندی ژنانی ئه‌و زیندانه ڕاگوێزرا.
“نازیلا مه‌عرووفیان” ڕۆژی ٢٠ی پووشپه‌ڕ پاش سكاڵای قه‌رارگای ساره‌ڵڵای سپای پاسداران له‌لایه‌ن دادسه‌رای ئه‌منیه‌تی زیندانی ئێڤین بانگهێشت و ده‌ستبه‌سه‌ر كرا. به‌پێی زانیارییه‌كان دادسه‌را له‌گه‌ڵ ئازادكردنی ناوبراو به بارمته‌ی ٣٠٠ ملیۆنی دژایه‌تی كردووه. ناوبراو ساڵی ڕابردوو و پاش وتوووێژ له‌گه‌ڵ باوكی “ژینا ئه‌مینی” له ماڵی یه‌كێك له هاوڕێیانی له شاری تاران ده‌ستبه‌سه‌ر كرا. “نازیلا” ٧٢ ڕۆژ له زیندانه‌كانی ئێڤین و قه‌رچه‌ك ڕاگێرا و ١٩ی به‌فرانباری ١٤٠١ به وه‌سیقه‌ی ٦٠٠ ملیۆن تمه‌نی ئازاد كرا. مانگی ڕێبه‌ندانی ساڵی ڕابردوو، لقی ٢٦ی دادگای ئینقلابی تاران ناوبراوی به “ته‌بلیغ دژی نیزام” و “بڵاوكردنی پڕۆپاگه‌ندا به مه‌به‌ستی تێكدانی بیر و ڕای گشتی” به دوو ساڵ زیندانی ته‌عزیری، ١٥ ملیۆن تمه‌ن سزای ماڵی و پێنج ساڵ قه‌ده‌غه‌ی چوونه‌ده‌ره‌وه له وڵات مه‌حكووم كرد.