ڕۆژی پێنجشه‌ممه ٢١ی مانگی ڕه‌شه‌ممه عه‌لی خامنه‌یی له وته‌كانیدا وێڕای پێهه‌ڵكوتن به شاخ و باڵی كۆماری ئیسلامی و ده‌سه‌ڵاتی دینی، وتی: “ئیسلامی سیاسی هه‌ر ئه‌وه‌یه كه له نیزامی ئیسلامیی ئێراندا وه‌دی هاتووه و ئه‌وه‌ش به كاری چكۆله و ته‌نیا به كرده‌وه‌ی ئایینی ده‌سته‌به‌ر نابێت. ئێمه ئیسلامی سیاسیمان زاڵ كردووه و كارمان به بیروبۆچوونی كه‌سانی جیابیر و ڕووناكبیرنوێن نییه. نابێ دوژمنایه‌تی بكه‌ن“. ئه‌وه‌یكه خامنه‌یی ده‌ڵێ ئیسلامی سیاسی هه‌ر ئه‌وه‌یه، ڕاسته. ئه‌وان پتر له ٤٠ ساڵه له ڕێگه‌ی كوشتن و سه‌ركوت و زه‌بروزه‌نگه‌وه ده‌سه‌ڵاتی ئسیلامییان به‌سه‌ر ئێراندا زاڵ كردووه. ده‌ستكه‌وتی ئه‌م نیزامه بۆ زۆربه‌ی هه‌ره‌زۆری كرێكاران و جه‌ماوه‌ری خه‌ڵكی سته‌ملێكراوی ئێران هیچ شتێك بێجگه‌له په‌ره‌سه‌ندنی هه‌ژاری و برسییه‌تی، زبڵگه‌ڕی، ئێعتیاد و له‌شفرۆشی، دیارده‌ی منداڵانی كار و سه‌رشه‌قام، كارتۆن‌خه‌وی و گۆڕخه‌وی نه‌بووه. به‌ڵام ئه‌م ده‌سه‌ڵاته بۆ سه‌رانی ڕژیم و ده‌زگای پان‌وبه‌رینی حه‌وزه‌كان و مافیای ناوه‌نده ئایینییه‌كان و فه‌رمانده‌كانی سپای پاسداران، سه‌رمایه‌داران و ئاغازاده‌كان و ده‌ست و پێوه‌نده‌كانی ڕژیم، به‌سوود بووه. ئه‌وان له ڕێگه‌ی ڕانتخۆری، گه‌نده‌ڵی و دزیی هه‌زاران ملیاردی، ژیانێكی شاهانه‌یان وه‌سه‌ریه‌ك ناوه و ئه‌م نیزامه بۆ ئه‌وان یه‌كجار پڕبه‌ره‌كه‌ت بووه.
له بواری سه‌ركوتی ئازادی و پێشێل كردنی مافی مرۆڤ، له ماوه‌ی چه‌ند مانگی ڕابردوودا كۆماری ئیسلامی به شێوه‌ی ئاشكراتر و به‌رین، سه‌ركوت، ئێعدام، كوشتنی ژێر ئه‌شكه‌نجه، ده‌ركردنی حوكمی قورس و ته‌نانه‌ت ڕفاندنی جیابیرانی ئایینی و لائیكی خستووه‌ته ده‌ستووری كاری هێزه ئه‌منی و قه‌زاییه‌كانییه‌وه. ڕژیم، چالاكانی سیاسی و مه‌ده‌نیی بزووتنه‌وه كۆمه‌ڵایه‌تییه‌كان، چالاكانی ژینگه‌پارێز، نووسه‌ران، چالاكانی سایبێری و تۆڕه كۆمه‌ڵایه‌تییه‌كان و وێبڵاگ نووسان، چالاكانی سیاسیی كه‌مینه نه‌ته‌وه‌ییه‌كان، په‌یڕه‌وانی ئایینی به‌هایی و ده‌روێشه گونئابادییه‌كان، موعه‌لیمان، خانه‌نشینكراوان و باقیی تۆژه‌كانی كۆمه‌ڵگای به‌توندی خستووه ژێر چاوه‌دێری و هه‌ڕه‌شه و حوكمی درێژماوه‌ی زیندان و ئه‌شكه‌نجه و ئێعدامی له‌دژیان ده‌ركردووه.
كه‌مپه‌ینی مافی مرۆڤی ئێران له ڕێكه‌وتی ١٨ی مانگی ڕه‌شه‌ممه‌دا، باسی له درێژه‌ی گوشاری ئه‌منی بۆسه‌ر ناوه‌ندی نووسه‌رانی ئێران كرد و هه‌واڵی حوكمی ١١ ساڵ زیندانی به‌سه‌ر “ئاره‌ش گه‌نجی” وه‌رگێڕ و یه‌كێك له ئه‌ندامانی ئه‌م ناوه‌نده‌ی به تۆمه‌تی بێبنه‌مای “كۆبوونه‌وه و ته‌بانی به ئامانجی تێكدانی ئه‌منییه‌تی میللی، ته‌بلیغ دژبه نیزام و ئه‌ندامیه‌تی یه‌كێك له گرووپه‌كانی دوژمن“، پشتڕاست كرده‌وه. كه‌مپه‌ینی مافی مرۆڤی ئێران، ئه‌م كرده‌وه‌یه‌ی ڕژیمی نیشانه‌ی ئاشكرای درێژه‌ی هه‌ڵسووكه‌وتی ئه‌منییه‌تی دژبه چالاكانی ناوه‌نده سه‌ربه‌خۆ مه‌ده‌نییه‌كان و فه‌رهه‌نگییه‌كانی داكۆكیكاری ئازادیی ڕاده‌ربڕین پێناسه كرد. ئه‌م كه‌مپیه‌نه هه‌روه‌ها په‌روه‌نده‌سازییه‌كانی پێشووی دژبه ٥ ئه‌ندامی دیكه‌ی ناوه‌نده‌ی نووسه‌ران (ڕه‌زا خه‌ندان، به‌كتاش ئابتین، كه‌یوان پاژه‌ن، كیتی پوورفازل، عه‌لیڕه‌زا نووری) و زیندانی كردنیان، ئاشكرا كرد. ئه‌م ٥ چالاكه مه‌ده‌نییه به تۆمه‌تی نووسینی كتێبێك سه‌باره‌ت به مێژووی ٥٠ ساڵه‌ی ناوه‌ندی نووسه‌ران و حزووریان له‌سه‌ر گڵكۆی گیان به‌ختكردووانی قه‌تڵه زنجیره‌ییه‌كان (محه‌ممه‌د جه‌عفه‌ر پوویه‌نده و محه‌ممه‌د مۆختاری)، زیندانی كراون. پارێزه‌رانی ناوه‌ندی نووسه‌ران، گشت تۆمه‌ته‌كانی ده‌زگای ئه‌منیی و قه‌زاییان بێبنه‌ما و ناته‌با له‌گه‌ڵ یاسا وه‌سف كردووه.
به‌ڵام كرده‌وه و دوژمنایه‌تیی ده‌سه‌ڵاتی ئیسلامی له‌گه‌ڵ جیابیرانی دینی و به‌تایبه‌ت هاووڵاتییانی به‌هایی له سه‌ره‌تای به‌ده‌سه‌ڵات گه‌یشتنی ئه‌م نیزامه‌وه هه‌تا ئێستا به‌رده‌وام وه‌حشیانه و نامرۆڤانه بووه. كارگێڕانی ڕژیم هه‌ر له سه‌ره‌تاوه ئایینی به‌هاییان به‌ڕه‌سمی نه‌ناسی و قه‌ده‌غه‌یان كرد. ئایینی به‌هاییان “گومڕاكه‌ر” و په‌یڕه‌وانیان لاده‌ر وه‌سف كرد. به‌هاییه‌كان به‌خاتری فتوا ئیسلامییه‌كان و ته‌بلیغاتی فریوكارانه‌ی خورافی و سووكایه‌تی، كه‌وتنه به‌ر نه‌فره‌ت و هێرشی ئه‌وباشه‌كانه‌وه. هه‌ر له سه‌ره‌تاوه پتر له ٢٠٠ كه‌سیان لێ ئێعدام كردن، ماڵه‌كانیان لێ ئاگر تێبه‌ردان و به‌زه‌ییان به منداڵه‌كانیان دانه‌هات و ماڵ و داراییان لێ تاڵان كردن و له خوێندنی باڵا و كاری ئیداری و ڕه‌سمی بێبه‌رییان كردن. له ئێستاشدا كۆماری ئسیلامی به شێوازێكی ئامانجدار، سه‌ركوتی له‌دژییان توندتر كردووه‌ته‌وه. كه‌وابوو وته‌كانی خامنه‌یی واته ” كارمان به بیروبۆچوونی كه‌سانی جیابیر و ڕووناكبیرنوێن نییه” درۆییه‌كی ئاشكرایه و هیچیتر. فێدراسیۆنی نێونه‌ته‌وه‌یی كۆمه‌ڵگه‌كانی مافی مرۆڤ له‌م دوایانه‌دا له ڕێگه‌ی به‌یانییه‌یه‌كه‌وه ڕایگه‌یاند كه “كۆماری ئیسلامی به‌نیازه سه‌ركوتی به‌هاییه‌كان و ده‌روێشه‌كان توندتر بكاته‌وه”.
به‌ڵام به‌ڕاستی هۆكاری سه‌ره‌كیی توندكردنه‌وه‌ی گوشاره‌كان بۆسه‌ر خه‌ڵك له لایه‌ن كۆماری ئیسلامییه‌وه له‌م دوایانه‌دا چییه؟ كۆماری ئیسلامی هه‌ر له سه‌ره‌تای به‌ده‌سه‌ڵات گه‌یشتنییه‌وه، یه‌كێك له بنه‌ماكانی ستراتێژیی مانه‌وه خۆی له‌سه‌ر سه‌ركوت و توندوتیژی بنیات ناوه. ڕژیم هه‌تا به ئه‌مڕۆ، پاش هه‌ر شكست و ناكارامه‌ییه‌ك له پڕۆژه و سیاسه‌ته كه‌ڵانه‌كانیدا، خۆی له‌به‌رده‌م مه‌ترسیی په‌ره‌سه‌ندنی ناڕه‌زایه‌تیی جه‌ماوه‌ری و ڕووخاندا بینیوه و هه‌وڵی داوه به توند كردنه‌وه‌ی ئێعدام و ئه‌شكه‌نجه و بارمته‌گیری و مرۆڤ‌ڕفێنی، كه‌ش و هه‌وای سه‌ركوت و توقاندن به‌سه‌ر كۆمه‌ڵگادا زیاتر زاڵ بكات و خه‌ڵك چاوترسێن بكات. له ئێستادا كه ڕژیم له لایه‌كه‌وه له‌سه‌روبه‌ندی سازش و نۆشینی جامی ژه‌هرێكی دیكه و وتووێژ له‌گه‌ڵ ئه‌مریكا دایه و له لایه‌كی دیكه‌شه‌وه برسییه‌تی له ئێران بووه‌ته كاره‌سات، بێكاری و گرانی و ته‌وه‌رۆم بێداد ده‌كات، لانیكه‌می حه‌قده‌ست ٦ به‌رابه‌ر له‌ژێر هێڵی هه‌ژاری دایه، گه‌نده‌ڵی و دزی له گشت ئۆرگانه‌كانی ڕژیمدا ڕیشه‌ی داكوتاوه و كۆماری ئیسلامی له پێكهێنانی هه‌رجۆره گۆڕانكارییه‌ك له‌پێناو باشتر كردنی باروودۆخی ژیانی جه‌ماوه‌ری كرێكار و زه‌حمه‌تكێش داماو و بێتوانایه، یه‌كجار نیگه‌رانی وه‌دی هاتنی ئه‌و كابووسه‌یه كه ساڵه‌هایه چاوه‌ڕوانی ده‌كات. به‌تایبه‌ت كه له ئاخێزی مانگی به‌فرانباری ٩٦ و خه‌زه‌ڵوه‌ری ٩٨دا كرێكاران و جه‌ماوه‌ری وه‌گیان هاتوو گۆشه‌یه‌ك له هێز و پۆتانسیه‌لی خۆیان به ڕژیم نیشان دا. باروودۆخی بابه‌تیی تێپه‌ڕینی شۆڕشگێڕانه له كۆماری ئیسلامی ئاماده‌یه و كوشتن و زیندانی كردنی جیابیران ناتوانێ ڕژیم له‌و چاره‌نووسه حه‌تمییه‌ی كه چاوه‌ڕوانی ده‌كات، ده‌رباز بكات.