به‌پێی ڕاپۆرتی ڕێكخراوی مافی مرۆڤی هەنگاو، ژمارەیەک لە بەندکراوانی زیندانی ناوەندیی سنە تووشی ویرووسی کۆرۆنا بوون و بەرپرسانی بەندیخانەش بەندکراوانیان لە مافی مه‌رەخەسی بێبەش کردووە.
بەپێی ئه‌م ڕاپۆرته، ڕۆژی چوارشەممە ٢٨ی جۆزەردان، بەرپرسانی زیندانی ناوەندیی سنە کۆبوونەوەیەکیان بۆ بەندکراوان گرتووە و ڕایانگەیاندووە کە چەندین بەندکراو تووشی ویرووسی کۆرۆنا بوون. شایانی باسه، ژمارەیک لە بەندکراوانی بەندی ١، ٢ و به‌ندی قورعانی زیندانی ناوه‌ندی سنە تووشی ویرووسی کۆرۆنا بوون، بەڵام هەتا ئێستا نە ئەو بەندکراوانە لە باقی بەندکراوانی دیکە جیا کراونەتەوە و نە کەرەستەی تەندروستی وەکوو خاوێنکەرەوە و ماسک بۆ بەندکراوان دابین کراوە. ئه‌مه له‌كاتێكدایه كه بەرپرسانی زیندان لە پێدانی مافی مه‌رەخەسی بە بەندکراوان خۆ دەبوێرن و ئەمەش ناڕەزایەتی بەندکراوانی لێکەوتووەتەوە.