دوو هاووڵاتیی خەڵکی مەریوان کە هاوینی ساڵی ڕابردوو لەلایەن هێزەکانی ئیدارەی ئیتلاعاتی ئەمشارە دەستبەسەر کرابوون، حوکمی زیندانیان بەسەردا سەپاوه و ڕەوانەی زیندانی مەریوان کراون.
به پێی ڕاپۆرته بڵاوكراوه‌كان، ڕۆژی یەکشەممە ٢٥ی جۆزەردان، دوو هاووڵاتیی خەڵکی مەریوان بە ناوەکانی ”
“یادگار دڵجو” و “سەرکەوت عیبادی” بە مەبەستی تێپەڕاندنی ماوەی حوکمەکەیان بۆ ناوەندی جێبەجێ کردنی حوکمەکانی مەریوان بانگ کراون و دوای دەستبەسەر کران بۆ زیندانی گشتی ئەمشارە گوازراونەتەوە. سەرکەوت عیبادی و یادگار دڵجو لەماوەی ڕۆژانی ڕابردوودا لەلایەن لقی چوارەمی دادگای سنە بە تۆمەتی “هاوکاری لەگەڵ یه‌كێك له حیزبه نه‌یاره‌كانی ڕژیم” حوکم دراون. بە پێی ئەو حوکمە سەرکەوت حوکمی یەک ساڵ زیندان و یادگار حوکمی ٧ مانگ زیندانی بە سەردا سەپاوە. شایانی باسه، ئەو دوو هاووڵاتییە کۆتایی مانگی پووشپەڕی ساڵی ڕابردوو لەلایەن هێزەکانی ئیدارەی ئیتلاعاتی مەریوان دەستبەسەر و دوای چەند مانگ بە دانانی وه‌سیقه و بە شێوەی کاتی ئازاد کرابوون.