به پێی ڕاپۆرته‌كان، چالاکێكی مەدەنی خەڵکی شاری ئیلام کە لە لایەن دادگای ڕژیم له شاری تاران حوکمی دوو ساڵ زیندانی بەسەردا سەپابوو، دەستبەسەر و ڕاپێچی زیندانی ئێوین کرا.
بەپێی ئه‌م ڕاپۆرته، “ڕوحوڵڵا میرزایی”، له ماوه‌ی ڕۆژانی ڕابردوودا بە مەبەستی تێپەڕاندنی ماوەی دوو ساڵەی حوکمەکەی دەستبەسەر و ڕەوانەی زیندانی ئێوینی تاران کرا. ڕوحوڵڵا میرزایی تەمەن ٢٧ ساڵ و دانیشتووی شاری ئیلام، ڕێکەوتی ٢ی مانگی گوڵانی پاره‌كه، بە هۆی چالاکییەکانی لە تۆڕە کۆمەڵایەتییەکان لە لایەن هێزەکانی وەزارەتی ئیتلاعات دەستبەسەر و بۆ بەندی ٢٠٩ی زیندانی ئێوین گوازترابوویه‌وه و ڕۆژی ٤ی جۆزەردانی هەمان ساڵ بە دانانی وه‌سیقه و بە شێوەی کاتی له زیندان ئازاد کرابوو. شایانی باسه، ناوبراو دواجار له وه‌رزی پاییزی ساڵی ڕابردوو لە لایەن لقی ٢٣ی دادگای ڕژیم له تاران بە تۆمەتی “بێ ڕێزی بە خامنه‌یی” و “پڕوپاگەندە له‌دژی نیزام لە تۆڕە کۆمەڵایەتییەکان” حوکمی دوو ساڵ بەندکرانی بە سەردا سەپا.