له ماوه‌ی یه‌ك دوو ڕۆژی ڕابردوودا، بەشێک لە چالاکان و ئەندامانی ڕێکخراوە مەدەنییەکانی شاری بۆکان، بە کۆبوونەوە لە بەر ماڵی “سەید ڕەحیم بەدەوی”، لە ڕێوڕەسمێکدا، وێڕای دەربڕینی هەستی هاوخەمی و هاوسۆزیی خۆیان، ڕووداوی دڵتەزێنی گیان له‌ده‌ستدانی ناوبراو لە بنەماڵە و کەسوکاری بەڕێزیان دەربڕی و ڕێزیان لە زەحمەت و تێکۆشانی لەخۆبردووانەی ئه‌و ماموستایه گرت.
بەپێی بڕیاری ڕۆژی پێشووی چالاکان و ڕێکخراوە مەدەنییەکانی بۆکان، بۆ ڕێزگرتن لە چالاکی و زەحمەتی بێوچانی چەندین ساڵەی “سەید ڕەحیم بەدەوی”، ناسراو بە “باوکی ژینگەپارێزیی” بۆکان و دامەزرێنەری یەکەم ڕێکخراوەی ژینگەپارێزی لەمشارە، بە کۆبوونەوە لەبەر ماڵی ناوبراو، بە پێشکەشکردنی وتار و خوێندنەوەی بەیاننامە، هەست و پێزانینی خۆیان بۆ تێکۆشان و فیداکاریی ناوبراو پێشان دا و بەڵێنیان دا بۆ هەمیشە وەفادار بە ڕێبازی پیرۆزی مامۆستای ژینگەپارێزیان بمێننەوە. لە سەرەتای ڕێوڕەسمەکەدا، پەیام و بەیاننامەی چالاکان و ڕێکخراوە مەدەنییەکانی بۆکان، لە لایەن “ئەمیر پیادە” بەرپرسی گشتیی ناوەندی فەرهەنگی و فێرکاریی “بەیان”وە پێشکەش کرا. پاشان لە درێژەی ڕێوڕەسمەکەدا هەرکام لە مامۆستایان؛ “مستەفا ئیلخانیزادە، ئەمین گەردیگلانی، شوانە و مەسعوود کوردپوور”، وێڕای دەربڕینی هەستی هاوخەمی، لەسەر کەسایەتی مامۆستا بەدەوی وتاریان پێشکەش کرد و چالاکی و زەحمەتەکانی ناوبراویان لە بواری پاراستن و پارێزگاری لە سروشت و ژینگەی شارەکەیان بەرز نرخاند.