بەپێی ڕاپۆرتی ڕێکخراوی مافی مرۆڤی هەنگاو، سێ ئەندامی بنەماڵەیه‌ك بە ناوەکانی “حامید شێخی، نەبی مەلاوەیسە و ئەیووب خانی” پاش ٤٠ ڕۆژ دەستبەسەر کران لە گرتووخانه‌ی ئیتلاعاتی شاری سنە هەر کامەیان بە دانانی وه‌سیقه‌ی ٢٠٠ ملیۆن تمەنی و بە شێوەی کاتی له زیندان ئازاد کران.
به پێی ئه‌م ڕاپۆرته، بەرەبەیانی ڕۆژی هەینی ٢٥ی ڕێبەندانی پاره‌كه، هێزە ئەمنییەکان لە شاری سەقز هەڵیانکوتاوەتە سەر ماڵی “حامید شێخی” و ناوبراویان وێڕای دوو كه‌سی دیكه به ناوەکانی “نەبی مەلاوەیسە” و “ئەیووب خانی” دەستبەسەر کرد. جێگه‌ی ئاماژه‌یه، ئەم هێزانە کە نزیکەی ٢٠ کەس ده‌بوون کاتژمێر ٧ی بەیانی و هاوکات لە گەڵ شەشەمین ساڵڕۆژی كوژرانی “خالید شێخی” هەڵیانکوتاوەتە سەر ئەو بنەماڵەیە و سەرەڕای دەستبەسەر کردنی ئەو سێ کەسە کەڵکیان لە ئێسپره‌ی بیبار وەرگرتووە و بێڕێزییان بە بنەماڵەكانیان کردووە و هەموو وێنەکانی ناوبراویان لەپێش چاوی بنەماڵەکەی دڕاندبوو.