ڕاپۆرته‌كان باس له‌وه ده‌كه‌ن كه بە بڕیاری فەرماندار و بەرپرسی نەخۆشخانەی شاری شنۆ، “خانەی مامۆستایان”ی ئەمشارە کراوە بە شوێنی قەرەنتینەکردنی نەخۆشانی تووشبوو بە ویرووسی کۆرۆنا و ئەم بڕیارە بووەتە هۆی ناڕەزایەتیی خەڵکی ناوچەی بارزان ئاوا لە شنۆ کە یەکێکە لە ناوچە هەژار نیشینەکانی ئەمشارە.
بە پێی ئه‌م ڕاپۆرته، دانیشتووانی ناڕازیی ڕایانگه‌یاندووه: نەخۆشانی تووشبوو بە ویرووسی کۆرۆنا کاتێک لە نەخۆشخانە دەردەچن لەو شوێنەدا قەرەنتینە دەکرێن و ئەو بڕیارەش دەبێتە هۆکاری تووشبوونی کەسانی تر بەم ویرووسە .ده‌شڵێن: شوێنی قەرەنتینە کردنی نەخۆشانی تووشبوو بە کۆرۆنا پێویستە لە ناوچەیەکی چۆل و دوور لە شار و خەڵک بێت، بۆ ئەوەی کەسانی تر تووشی ویرووسه‌كه نەبن. شایانی باسە، لەگەڵ بڵابوونەوەی ویرووسی كوڤیدی ١٩ بە شێوەیەکی بەربڵاو بە شارەکانی ئێران و کوردستاندا، وڵاتی ئێران لەگەڵ کەمی ئیمكاناتی تەندروستی و ناوەندە دەرمانییەکان و شوێنی مانەوەی نەخۆشەکان بەرەوڕووبۆتەوە و ئەوەش نیگەرانی لای خەڵک دروست کردووە و متمانەیان بەم حکومەتە نەماوە کە بتوانێ پارێزەری گیانی خەڵکەکەی بێت.