خەباتی ئێوە بۆ ئازادی پێی ناوەتە قۆناغێکی نوێوە. لە ئێستادا خەڵکی ئێران پەیوەست بوون بە ڕاپەڕینەکەتانەوە. مێشکتان بەیەکەوە هاوئاهەنگ و دڵەکانتان بەیەکەوە بەستراوەتەوە. ئێمە ستایشی هەوڵەکانتان دەکەین و شانازی بە پێداگریتان دەکەین بۆ بەدیهێنانی ئازادی. لەم ڕاپەڕینە گشتییەدا، کە لە گەشەکردنی فەرهەنگی خەباتکارانە و هۆشیاری کۆمەڵایەتییەوە سەرچاوە دەگرێت؛ هەریەکەتان لە ناڕەزایەتیەکاندا ڕۆڵی سەرکردە و هیدایەتگەرتان بینی.
ڕزگاربوون لە زوڵم، ئەرکی سەرشانی هەر یەکێک لە ئێمەیە و بە دڵنیاییەوە ئازادیش هی هەموومان دەبێت. لەم ڕۆژانەدا دەبێت دەستمان لە دەستی یەکتر هەڵپێکین و بە دەستەکانمان زنجیرێکی لە پساننەهاتوو دروست بکەین. مەودایەکی زۆرمان بۆ لە ئامێزگرتنی ئازادی نەماوە. پێویستە پێکەوە خەبات بکەین و بڵێسەی شۆڕش لەدژی ڕژیمی کۆماری ئیسلامی داگیرسێنین. ئێمە نیشانماندا کە شایستەی سەرکردایەتیکردنی ئەم ڕاپەڕینە ڕزگاریخوازەین؛ هەر لەبەر ئەم هۆکارەش دەبێت لێبڕاوانە بەردەوام بین لەسەر درێژەدان بە ڕێگاکەمان تا بەدیهێنانی ئامانجەکەمان و هەموو شەوێک ناوچە جۆراوجۆرەکانی شار بکەینە گۆڕەپانی ڕاپەڕین دژی ئەم ڕژێمە خوێنڕێژ و جینایەتکارە. بوونی هەریەکێک لە ئێمە داهاتوومان مسۆگەر دەکات. لەم ڕووەوە بەرەی خۆڕاگریی خەڵکی کوردستان داوا لە هەموو خەڵکی خەباتکار و مافخواز دەکات کە دەرفەتەکان بۆ ئەنجامدانی ناڕەزایەتی و خۆپیشاندان لەدەست نەدەن و تا ڕووخاندنی ئەم دەسەڵاتە گەندەڵە ئاگری ڕاپەڕین هەروا بڵێسەدار بهێڵنەوە. لە هەڵبژاردنی “کات” و “شوێن” و “ئەگەر“دا، بڕیاری دروست لای تۆیە! با لە چوارچێوەی تۆڕ و ڕایەڵەی شۆڕشگێڕانەدا کات و شوێنەکان دیاری بکەین و ئاسانکاری پێویست بۆ ڕووبەڕووبوونەوە لەگەڵ هێزە ستەمکارەکان فەراهەم بکەین.
لە سبەینێ دووشەممە 11ی ئۆکتۆبەرەوە هەموومان بەیەکەوە لە گەڕەکەکان ئامادە دەبین…