هەروەک ئاگادارن ڕۆژی ٢٨ی سپتامبری ٢٠٢٢ کۆماری ئیسلامی به مووشەک و فرۆکەی بێ فرۆکەوان هێرشی کردە سەر بارەگاکانی پارتەکانی ڕۆژهەڵاتی کوردستان له هەرێمی کوردستان و به داخەوە بووە هۆی گیان لە دەستدانی ژمارەیەک لە ئەندامان و لایەنگرانی حیزبی دموکراتی کوردستانی ئێران و پارتی ئازادی کوردستان.
نوێنەرایەتی کۆمەڵە لە دەرەوەی وڵات، وێڕای ئیدانه کردنی ئەم کردەوە تیرۆریستییە، لە هەموو ڕێکخراوه مرۆڤ دۆستەکان و ناوەندە نێونەتەوەییەکان داوا دەکات که ئەم کردەوه ئیدانە بکەن و ڕاستەوخۆ کۆماری ئیسلامی وەک دەوڵەتێکی تیرۆریست بناسێنن.
هەروەها لە هەموو ڕێکخراوە سیاسییە ئازادیخوازەکانی ئێران و کوردستان داوا دەکەین کە لە درێژەی هاوکارییەکان لە دژی کۆماری ئیسلامی، ئەم جارەش بە هاوکاری و هاودەنگیێکی بەرین تر دژی هێرشی تیرۆریستی بۆ سەر بارەگاکانی پارتە سیاسییەکانی کوردستان چالاکی هاوبەش بەڕێوە بەریین و زیاتر لە ئێستا هەڵوێستی جهانیان لە دژی کۆماری ئیسلامی بەدەست بێنین. بۆ ئەم مەبەستە لە هەموو تاکی ئازایخواز و لایەنگرانی ئاخێزی جەماوەری لە ئێران و کوردستان داوا دەکەین وڵامی ئەرێنی بە بانگەواز بۆ ڕێپێوان و خۆپیشاندان لە دەرەوەی وڵات بدەنەوە و ببن بە بەشێکی چالاک لە خەباتی خەڵکی ئازادیخوازی ئێران و کوردستان. بانگەواز بۆ مانگرتنی گشتی لە ڕۆژی شەممە ٩ی ڕەزبەر یەکێکه لەو بوارانە کە پێویستە ئازادیخوازان لە هەموو جیهان پشتیوانی لێبکەن و لە هەمان ڕۆژدا لە شارە گەورەکانی وڵاتان و لە بەردەم باڵوێزخانەکانی ڕژیمی ئیسلامی دا خۆپیشاندان و رێپێوان بکەن.
کۆماری تیرۆریستی ئیسلامی کە لە ژێر گوشاری ناڕەزایەتییە جەماوەرییەکاندا دەناڵێنێت و هەست بە مەترسی لە ناوچوون دەکات، بە هێرش کردنە سەر پارتە سیاسییەکانی کوردستان دەیهەوێت ئەو گوشارە لە سەر خۆی سوک بکات و پێگەی کوردستان وەک سەنگەری ئاخێزی جەماوەری لە هەموو ئێران لاواز بکات. بەڵام نە هێرش بۆ سەر حیزبە سیاسییەکان و نە هێرش بۆ سەر کۆمەڵانی خەڵکی ڕاپەڕیو لە شەقامی شارەکان، ناتوانێت ئەم ڕژیمە بپارێزێت و دەسەڵاتەکەی مسۆگەر بکات.
بروخێت کۆماری ئیسلامی ئێران!
سەرکەوتوو بێت ئاخێزی جەماوەری لە ئێران!
سەرکووتوو بێت بزووتنەوەی شۆرشگێڕانەی کوردستان!
نوێنەرایەتی کۆمەڵە لە دەرەوەی وڵات
٢٨ سپتامبری ٢٠٢٢