ڕۆژی پێنجشه‌ممه ٦ی گوڵانی ١٤٠٣، چالاكانی سیاسی و مه‌ده‌نی له ئێران و جیهان، نوێنه‌رانی پاڕله‌مان له ئورووپا، ئه‌مریكا و كانادا، به‌ندكراوانی سیاسی و ڕێكخراوه سنفی و كرێكارییه‌كان، سه‌پاندنی سزای ئێعدامیان به‌سه‌ر “تووماج ساڵحی” به توندی شه‌رمه‌زار كرد.
“نازیلا مه‌عرووفیان” ڕۆژنامه‌وانی خه‌ڵكی سه‌قز، “نه‌رگس محه‌ممه‌دی”، “نه‌سرین ستووده”، ژماره‌یه‌ك له چالاكانی سیاسی ئێران، نوێنه‌رانی پاڕلمان له ئورووپا، ئه‌مریكا و كانادا، بنه‌ماڵه‌ی دادخوازان و چالاكانی بواری مافی ژنان له چه‌ندین په‌یامی جیاجیادا سه‌پاندنی حوكمی ئێعدامیان به سه‌ر “تووماج ساڵحی” به نامرۆڤانه و نایاسایی ناوبرد و شه‌رمه‌زاریان كرد. چالاكانی سیاسی و مه‌ده‌نی داوایان له كۆمه‌ڵگای نێوده‌وڵه‌تی كرد ڕێگه له به‌ڕێوه‌چوونی ئه‌و حوكمه بگرن و به‌رپرسانی قه‌زایی و ئه‌منیه‌تی كۆماری ئیسلامی سزا بده‌ن. جێگای ئاماژه‌یه كه “حامد ئیسماعیلیوون” بۆ ڕۆژانی شه‌ممه و یه‌كشه‌ممه بانگه‌وازی بۆ خۆپێشاندان له سه‌رانسه‌ری جیهان دژبه كۆماری ئیسلامی كردووه.