شۆڕای هاوئاهەنگی هەرسێ دەسەڵات بە تەئیدی خامنەیی لە مانگی خەزەڵوەری ئەمساڵدا پەسندکراوێکی ڕاگەیاند کە لە سەر بنەمای ئەو بەشێک لە ئەموالی دەوڵەتی کە بە سودبەخش و بەرهەمهێن نەزاندرێن، بە کەرتی تایبەت بدرێن، تا شایەد ئەوان بکرێنە سودبەخش و بەرهەمدەر. ئەو پەسندکراوە لە ٧ی مانگی خەزەڵوەردا لە سایتی دەوڵەتیدا بڵاو کرایەوە و تەنیا دوای دوو مانگ هێندێک لە وردەکاریەکەی خرایە ئیختیار ڕاگەیەنەرەکان. ئەندامانی شۆڕا بڕیاریاندا بۆ بەکرەدەدەرهاتنی ئەم پەسندکراوە هەیئەتێکی ٧ کەسی پێکبێنن. هەیئەتەکە بریتی بوون لە: جێگری یەکەمی سەرۆک کۆمار، وەزیرانی نێوخۆ، ئابووری و دارایی، ڕێگا و شارسازی، جیهادی کەشاوەرزی و سەرۆکی سازمانی بەرنامە و بوجە. ئەمان تەشخیس ئەدەن کە ئایا بۆ نمونە زانکۆی تاران بەرهەمهێن بووە یان فڵان شیرکەت، کارخانە و یان مەعدەنی دەوڵەتی سودبەخشە یان نا. بەم پێیە هەم نرخیان بۆ دیاری دادەنێن و هەم لایەنی معامەلەکە دیاری دەکەن.
ئەندامانی هەیئەتی ٧ کەسی و کەسانێک کە بۆ ئیجرای ئەم پەسندکراوە دیاری دەکرێن، لە کاتی ئیجرای پەسندکراوەکە دا لە هەموو جۆرە بەدواداچوونێکی قەزایی پارێزراو دەبن. و نەک هەر ئەوە، هیچ کەس مافی دژایەتی کردنیانی نییە و بڕیارەکانیان دەبێ بەخێرایی بە کرداری بکرێن. ئەگەر کەس، کەسان و یان گوروپێک دژایەتیان بکات و یان کۆسپ دروست بکات لەبەردەمیان لە دادگایەکی تایەبەتدا بە داواداچوونی بۆ دەکرێت و سزای تایبەت بەو پەسندکراوەی” بەبێ دواکەتن و ڕاگرتن و کەمکردنەوە بەسەردا دەسەپیندێت“. بۆ نمونە کرێکارانی موجتەمەعی پیشەسازی حەوت تەپە بەر لە بە دەوڵەتی بوونی سەرلەنوێی کۆمەڵگەکە سەبارەت بە پڕۆسەی خوسوسی سازیەکەی ناڕازی بوون و کەس نەیتوانی ئەوان لەبەر ئەو دژایەتیە دادگایی بکات. سەبارەت بەو خوسوسی سازیانەی ئەوان بەڕێوەی دەبەن هەر کەس ناڕەزایەتی نیشان بدات بەرەوڕووی دەستبەسەرکران و زیندان دەبێتەوە. لە ڕاستیدا سەرجەم دەسەڵاتە ئیستبدادیەکانی وەلی فەقیە لەم بوارەدا بە سەرانی هەرسێ قوە و هەیئەتی هەڵبژێردراو لە لایەن ئەوانەوە دراوە.
پەسندکراوی سەرانی سێ قوە بە کردەوە درێژەی خوسوسازیەکانە لە پانتاییەکی بەرین و لەلایەن کەسانێکەوەیە کە لەم چوارچێوەیەدا بەبێ ترس و نیگەرانی لە هەر بەدوادا چوونێکی قەزایی دەتوانێ سەروەت و سامانی خەڵک بە تاڵان بەرێت. ڕەوتی خوسوسی سازی لە هەموو چواردەیەی ڕابردودا ئاوێتەی گەندەڵی هەمە لایەنە و ڕانت خۆری بەرین بووە. تەکلیفی ئەمەشیان هەر لە ئێستاوە ڕۆشنە. گومانی تێدا نییە کە دەسەڵاتداران لە سپا و حکومەت و کەسانی سەر بەوان و کەرتی تایبەتی گوێلەمست لە ئێستاوە ددانی تەماعیان بۆ تاڵان کردنی سەروەت و سامانی خەڵک لە پێشو تیژتر کردوە.
دوکەڵی خوسوسی سازیەکان لە سەرتاسەری وڵاتاندا و بەتایبەت لە کۆماری ئیسلامیدا دەچێتە چاوی ئەو کرێکارانەوە کە بێکار دەبن و یان لەسەرکار دەمێننەوە و ئەرکی زیاتریان دەخرێتە سەرشان و لە ماف و مەزایاکانیان کەم دەکرێتەوە. لە ڕاستیدا ئەندامانی کابینەی وەرشکست بوو و قەیران لێدراوی ڕەئیسی جەللاد دەیەوێ بە تاڵانکردنی سەروەت و سامانی خەڵک باری دابینکردنی کەسری بودجە نجومیەکەی بخاتە سەر شانی چینی کرێکار و خەڵکی بێبەش. ئەندامانی ئەم کابینەیە بە بودجەیەکی سەرکوتی کە بۆ ساڵی ١٤٠٢ یان ئامادە کردوە و داویانەتە مەجلیس و بە پێشبینی زیادبوونی ٢٠ لەسەد بە حەقدەستەکانی کرێکاران و کارمەندانی دەوڵەتیەوە دیسانیش باری داسەپاو بەسەر شانی چینی کرێکاردا لە ڕابردوو قورس تر دەکات. ئەو پەسندکراوە و بودجەی ساڵی داهاتوو، کەسانێکی زیاتر بەرەو ژێر هێڵی هەژاری دەبات، برسیەتی توێژی کەم داهات و لەوانە ئەو دایکانەی شیر ئەدەن بە منداڵەکانیان زیاتر دەکات. منداڵانی ساوا، منداڵان و گەورەساڵانێکی زیاتر بەرەوڕووی بەدخۆراکی دەکاتەوە. کە وایە پێوستە کرێکاران و خەڵکی هەژار و بێبەش لەسەر بەستێنی شۆڕشی” ژن، ژیان، ئازادی” و بە خەباتی شێلگیرانە و یەکگرتوانەیان ئیجازە نەدەن خەونی سەرانی سێ قوە، خامنەیی و کولیەتی کۆماری ئیسلامی لەدژی خەڵک بێتەدی و دەبێ بەرەو کۆتایی تەمەنی پڕ لە جەنایەتی پاڵ پێوەبندرێت.