ڕۆژی پێنجشەممە ٢٣ی مانگی بەفرانبار، لە شاری ئامەدی باکووری کوردستان دانیشتنی دادگای ڕۆژنامەنووس “ڕۆژهات دۆغروو”، پەیامنێری تەلەفزیۆنی گەلی کوردستانی سەر بە یەکێتی نیشتمانی کوردستان بەڕێوەچوو و سزای زیندانی هەتاهەتایی بەسەر ئەو ڕۆنامەنووسەدا سەپێندرا.
“ڕۆژهات” کە هەشت ساڵ لەمەوبەر بە دیاریکراوى لە مانگى ١٠ ى ساڵى ٢٠١٤ لە پێکدادانێکى چەکداریدا لە ئامەد بە فیشەک برینداربوو و دواتر دەستگیرکرا، پاش نزیکەی هەشت ساڵ مانەوەى لە زیندان، دادگاى دەوڵەتی تورکیە لە ئامەد بە تۆمەتى “هەوڵی کوشتنی بەئەنقەست” و “بانگەشە بۆ ڕێکخراوێکی تیرۆریستى” سزاى هەتاهەتایی بەسەردا سەپاند. شایانی باسە ئەو ئەفسەرەی کە “ڕۆژهات”ی دەستبەسەر کردووە لە دانیشتنەکەی دادگادا بیری نەکەوتەوە، کە ئایا ناوبراو کامێرای وێنەگرتنی پێبووە یان دەمانچە.