ڕۆژی شەممە ١٨ی سەرماوەز، “ئەمجەد ئەمینی”، باوکی هه‌میشه زیندوو “ژینا ئەمینی” ڕاگەیەندراوێکی لەبارەی قەدەغەکردنی ڕۆیشتنی خۆی و بنەماڵەکەی بۆ دەرەوەی وڵات بە فەرمانی وەزارەتی ئیتلاعات بڵاو كردەوە.
لەم بەیاننامەیەدا هاتووە: “لە بەرپرسانی پێوەندیدار بە دادستانی تارانم پرسی، من و بنەماڵەکەم بەپێی چ یاسایەك دەبێ مافەکانمان وەک هاووڵاتییه‌كی ئێرانی پێشێل بكرێ و ڕۆیشتنمان بۆ دەرەوەی وڵات قەدەغە بکرێت، بەڵام هیچ وڵامێكی ڕوونم وەرنەگرت. مەگەر بەپێی یاسا، قەدەغەكردنی چوونەدەرەوە لە وڵات تەنیا لە ئه‌ستۆی دەسەڵاتی دادوەریی نییە؟ ئەگەر هەیە، ئەی بۆچی فەرمانی دەسەڵاتی دادوەریمان پێ ڕاناگەیەندرێت كە بزانین بە كام تاوان چوونە دەرەوە لە وڵاتمان لە ئێستادا لێ قەدەغە كراوە؟ بێگومان دەزانین کە تاکە تاوانمان ئەوەیە کە ئێمە بنەماڵەی ژینا ئەمینین”.