ڕۆژی شه‌ممه ١٢ی جۆزه‌ردان، دانیشتووانی شاری ئێزمیر له توركیا، هاوكات له‌گه‌ڵ ساڵڕۆژی سه‌ركوتی ناڕازیان له پاركی گه‌زی ئیستانبوول، ڕژانه سه‌ر شه‌قام و یادی قوربانیانی ئه‌و ڕووداوه‌یان به‌رز ڕاگرت.
ڕۆژی ٢٨ی مه‌ی ساڵی ٢٠١٣ی زاینی، پۆلیسی توركیا به شێوه‌یه‌كی وه‌حشیانه هێرشی كرده سه‌ر ناڕازیان له مه‌یدانی ته‌قسیمی ئیستانبوول و سێ كه‌سی كوشت و به سه‌دان كه‌سی بریندار و ده‌ستبه‌سه‌ر كرد. ده‌وڵه‌تی ئه‌ردۆغان له ساڵی ٢٠١٣ بڕیاری دا دارستانه‌كانی پاركی گه‌زی ببڕێته‌وه و له شوێنه‌كه‌ی بینایه‌كی فه‌رهه‌نگی مه‌زهه‌بی ساز بكات، چالاكانی مه‌ده‌نی و خه‌ڵكی ناڕازی له ناڕه‌زایه‌تی به فه‌رمانی ده‌وڵه‌ت ڕژانه سه‌ر شه‌قام، به‌ڵام به توندترین شێوه سه‌ركوت كران. خۆپێشاندانه‌كان بۆ چه‌ند شاری دیكه‌ی توركیا په‌ره‌ی سه‌ند و ناڕازیان پردی بۆسفۆڕیان له ئیستانبوول داخست و له‌گه‌ڵ هێزه‌كانی پۆلیس به‌شه‌ڕ هاتن.