سه‌رله‌به‌یانی ئه‌مڕۆ ڕۆژی هه‌ینی ٢٧ی مانگی ڕه‌شه‌ممه، ڕێوڕه‌سمی ڕێزلێنان له یاد و بیره‌وه‌ری هاوڕێیانی گیانبه‌ختكردووی كۆمه‌ڵه له گوردانی شوان و گیانبه‌ختكردنی ٥ هه‌زار مرۆڤی بێ تاوانی هه‌له‌بچه به گازی شیمیایی، به به‌شداری كۆمه‌ڵێك له پێشمه‌رگه‌كانی كۆمه‌ڵه له مه‌قه‌ڕی ناوه‌ندی كۆمه‌ڵه له زڕگوێزی سه‌ر به شاری سلێمانی به‌ڕێوه‌چوو.
ئه‌م ڕێوڕه‌سمه سه‌ره‌تا به خوێندنی كۆپله شیعرێك له لایه‌ن به‌ڕێوبه‌ری به‌رنامه‌كه هاوڕی “ئه‌میر ئیسماعیل_پوور” و سروودی ئه‌نترناسیۆناڵ سروودی هاوپشتی جیهانی چینی كرێكار ده‌ستی پێكرد. دواتر بۆ یادی هاوڕێیانی گیانبه‌ختكردووی گوردانی شوان و قوربانیانی هه‌له‌بچه و سه‌رجه‌م گیانبه‌ختكردووانی ڕێگای ئازادی و سوسیالیزم خوله‌كێك بێده‌نگی ڕاگیرا. له درێژه‌دا هاوڕێ “حه‌سه‌ن ڕه‌حمان_په‌نا” ئه‌ندامی كومیته‌ی ناوه‌ندی كۆمه‌ڵه به بۆنه‌ی ڕووداوی كاره‌ساتباری هه‌له‌بچه و گیانبه‌ختكردنی هاوڕێیانی گوردانی شوان وتارێكی پێشكه‌ش كرد و پاشان له لایه‌ن هاوڕێ “چیاكۆ محه‌مه‌دی” فه‌رمانده‌ی ئێستای گوردانی شوان به‌م بۆنه‌وه به‌یاننامه‌یه‌ك پێشكه‌ش كرا. له كۆتاییدا ڕێوڕه‌سمه‌كه به خوێندنی ناوی هاوڕێیانی گوردانی شوان و كۆپله شێعرێكی هاوڕێ “فه‌ره‌یدوون نازری” كه به‌م بۆنه‌وه‌ی وترابوو خوێندرایه‌وه و ڕێوڕه‌سمه‌كه به سه‌رخستنی سروودی “سیروان” كۆتایی پێهات.