سڵاو لە وەرزی گەشانەوە، سڵاو لە وەرزی سەرهەڵدان و ڕاپەڕین
كۆمەلانی خەلكی كوردستان! كرێكاران، خەلكی زەحمەتكێش،
ئازیزانی بنەمالەی گیانبەخت كردوان،
هاورییانی هەلسووراوی ریبازی كۆمەلە لە هەر شوینیك كە هەن!
تیكوشەرانی زیندانی لە سیاچالەكانی رژیم!
نەورۆز و سالی تازەتان لێ پیرۆز بێ. هیوادارین لەسالی نوێ‌دا، غەم لە ژیانتان دور و رۆژانیكی پڕ لە شادی و ئاسوودەیی چاوەریتان بێ. هیوادارین، سالی نوێ سالی سەركەوتنی گەورە و سالی وەدیهاتنی ئاوات و ئارەزوەكانی شەریف و ئینسانیتان بێ.
ئازیزان!
نەورۆز، هێمای خەباتی ڕووناکی دژی تاریکی، وەبیرهێنەرەوەی سەرکەوتنی بێداریە بەسەر بێدەنگیدا. ئەمساڵیش، ئاگری نەورۆز لە سەرتاسەری کوردستان بڵێسە دەدات تاکو دەنگی ئازادیخوازی و داوای گۆڕان بگەیەنێتە گوێی جیهان. گڕی ئەم ئاگرەی کە لەم نەورۆزە دا بڵیسە ئەسێنێ لە هەمان کاتدا هێمای ئەو ئاگرەیە کە لە دڵی ئێوەدا زیندووە بۆ بونیات نانی جیهانێکی باشتر.
نەورۆز لە کوردستاندا، بەم جۆش و خرۆشەی کە بەرێەوە دەچێت تەنها جەژنێکی ساکار نییە؛ بەڵکو ڕاهێنان و خۆسازدانێکە بۆ سبەیەک کە تێیدا جەماوەری خەڵکی تینوی ئازادی، چارەنووسی خۆی بە دەستی خۆی دەنووسێتەوە.
ئامادەبوونی پڕشکۆی ئێوە لە ڕێوڕەسمەکانی ئەم ساڵی نەورۆزدا، لە ژن و پیاو و پیر و لاو،دەست لە ناو دەستی یەک ئەو پەیامەی پێیە: کە هیچ هێزێک ناتوانێت ئیرادەی گەلێک کە هەستاوەتە سەر پێ، تێک بشکێنێت. ئەم کۆبوونەوە جەماوەری و شکۆدارانە، پێشەکییەکن بۆ کۆبوونەوەی گەورەتری سبەێ، ئەو رۆژەی کە دەرفەتی بڕیاردان لەسەر چارەنووسی خۆتان، هی ئێوە دەبێت.
ئێمە دەزانین ئێوە کە ئاوا بە جۆش و خرۆشەوە رێورەسمەکانی نەورۆز پەرپا دەکەن لە چ بارودۆخێکی دژواری ژیاندان. هیچ ووشەیەک ناتوانێ قورسایی ئەو کارەساتەی کە گرانی و بێکاری و نەبونی و هەژاری بە سەر زۆرینەی خەڵکی ئەو وڵاتەی دا سەپاندۆە بەیان بکات .
ئێمە باش دەزانین شادی نەورۆزانەی ئێوە ریشەی لە تورەیی پنگ خواردوی گەلێک دایە کە ئەم ژیانە بە شایستەی مروڤی ئەم سەردەمە نازانێ و پەیامێکی روونی پێیە بۆ دوژمنانی ئەو خەڵکە کە: بترسن لەو رؤژەی کە خرۆشی جەماوەر هەر لەو ئاستەدا و بەرین تریش بێتە مەیدان و ئەو جار راستەوخۆ لە دژی ئێوە ئەکەوێتە رێ تەخت و بەخت و ژیانی فیرعەونیتان تێکەوە دەپێچێت .
ئازیزان!
هەموو نیشانەکان ئەوەمان پێ‌دەلین كە هەل و مەرجیكی سیاسی نوێ لە ئیران هاتوەتە كایەوە. واته ئەگەر نەك لە هەموو ژیانی رژیمی کۆماری ئیسلامی بەڵکو هەر لە ئەو یەک سالەی كە تیپەرمان کرد وردبینەوە، ئەو راستییەمان بۆ دەردەكەوی كە هەم بارودۆخی ناوخۆی دەسەڵات وەکوو جاران نەماوە هەم هاوسەنگی هێز بە قازانجی جەماوەر گۆراوە. لەو رۆژەوە کە شۆرشی ژینا لە کوردوستانەوە چەخماخەی لێدرا تا بە ئەمرۆ کۆمەڵگای ئێمە هەنگاوی گەورەی بەرەوپیش هەلگرتوە و گەلیك ئەزمونی بە نرخی وەدەست هیناوە. ئەو ئەزمونانەی کە دەبن بە پالپشتی حەرەكەتی داهاتوومان. چەند تایبەتمەندی بەرجەستە بۆ ئەو بارو دۆخە بەدی دەكری:
یەكەم، جەماوەری خەلك ئیتر چاوەریی هیزیكی نەجات بەخش نین كە لە شەویكی تاریك دا لەو دیوی سنورەکانەوە بێتەوە ورزگاریان كات، ئەوان خۆیان ئەو هیزەن، كە دەتوانن بە رۆژی روناك جیگا بە رژیمی ئیسلامی لە هەمو کوردستان تەنگ بکەن.
دووهەم ، نە ئەمریکا و نە هیچ زلهێزێک عاشقی چاو و برۆی خەڵکی ئەو وڵاتە نین ئەوان بە شوێن بەرژەوندی خۆیانەوەن و بەرژەوەندی ئەوان لە گەڵ بەرژەوندی زۆرینەی خەڵکی ئەو وڵاتە یەک نییە..
هەر گیز ئازادی و ژیانی باشتر ناتوانێ بەرهەمی دەست تێوەردانی جینایەتکارێک وەکو ناتانیاهو و رەوش فاشیستێکی وەکو ترامپ لە وڵاتە بێت. واتە ئەوەی بە دەستی خۆمان و بە شان و پیلی خۆمان و بە خەباتی خۆمان بەدەستی نەهێنین بە دەست نایەت.
سێهەم، کۆماری ئیسلامی لەوەها بن بەستێک دا گیری کردۆە کە رێگەی دەرباز بونی نییە. ئامرازەکانی بۆ بەرەو روو بونەوە لە گەڵ جەماوەری نارازی کول و ناکارابون. بگیر و ببەند و هیز نواندن و هەرەشە و ترساندن، كاریگەری نەماوە، خەلك بوێر و چاونەترسن و لە بەرانبەر ئەو تاكتیكانەی رژیم دا پاشەكشە ناكەن.
چوارەم: حەرەكەتەكان، یەك لە دوای یەك و نەپساوەن، لە نارەزایەتی دەربرێنێکەوە و بۆ نارەزایەتی دەربرینێکی تر، لە مانگرتنیكەوە بۆ مانگرتنیكیتر. ئەوە سەرهەلدانی تەریك كەوتووی شاریك نیە كە لەرووی هەلچوونی لافاوی توورەیی جەماوەر بەهۆی سیاسەت یان كردەوەیەكی دیاری كراوی رژیم رووی دابێ، بەلكوو وەكوو ئالقەكانی زنجیریك پیكەوە گرێ دراون. ئەوە تۆپەلە بەفریكە كە لە هەورازیەكەوە كەوتوەتە رێ و رنویەكی گەورە لەرێ دایە.
ئەم خەباتە لە هەمان كات دا كە پەرە دەستینی، بەرە بەرە قوولتریش دەبیتەوە. قوولتر بوونەوە، بە مانای ئەوەیە كە روو دەكاتە گیروگرفتەكانی پەیوەندیدار بە ژیانی ئابوری خەلكی كریكار و زەحمەتكیشەوە. لەم بوارەدا رژیم نەدەتوانی و نە دەیهەوی ئال و گۆریك لە ژیان و گوزەرانی خەلك دا پیك بینی. لیرەدا رژیم ئیمكانی فریودان و چاوبەستنی خەلكی نیە. بەلینی ئەمرۆ بۆ سبەینی بۆ بنەمالەیەكی كریكاری كە منالیان رەش و رووتە و نان لە سفرەیان دا نیە و هەشتیان لە گرەوی نۆیان دایە، بڕ ناكات.
. خەڵکیکوڵنەدەری کوردستا ن
ئەوە باوەڕ بکەن، هەر شەوێکی تاریکی ستەم، بەرەبەیانێکی روناکی ئازادی بەشوێنەوەیە. مێژووی خەباتی گەلانی ئازادە و مافخواز لە سەرانسەری جیهاندا، شایەتیدەرە کە: پەتی زوڵم لە ئەستوری دەپسێ، ئەستێرەکان لە ناخی تاریکی دا هەڵدێن و روناکی دەبەخشن.
خۆڕاگری کچانی ئازا و بوێر کە بە دروشمی ژن ژیان ئازادی پرچیان بەدەم با دا رەها دەکەن ، دروشمەکانی پڕ مانای شۆرەکورانێک ، کە ئەونیزامە ئاسۆی دوارۆژیان لێ لێڵ کردون ، نیشان دەدات کە نەوەی نوێ شان بە شانی کرێکاران وشیار و پێشرەو بە هیوایەکی پتەوەوە باری ئەم ڕێگایە بە شان هەڵدەگرن. ئێوە فێر بوون کە تەنانەت لە سەختترین زستانەکاندا، رەگی ئازادی لە قووڵایی خاکدا زیندوو دەمێنێتەوە و بە گەیشتنی بەهار، چرۆ دەکات.
ئەمساڵ، نەورۆز بۆ خەڵکی کوردستان واتایەکی قووڵتری هەیە. کۆبوونەوە ملیۆنییەکانی ئێوە لە گۆڕەپانی شار و دێهاتەکاندا، بە جلوبەرگی رەنگا و رەنگ و بە سەمای جوانی هونەرمەندانەوە تەنها جەژنێک نییە؛ بەڵکو نومایشی یەکێتی و ناسنامەی بەکۆمەڵی ئێوەیە.
ئەم وێنەیە، نەخشێکە لە داهاتوویەک کە تێیدا مافی بەڕێوەبردنی ژیان، هی جەماەری خەڵکە و بڕیارەکان لە گۆڕەپانە گشتییەکاندا، بە هاواری “ئێمە دەمانەوێت” دەدرێن. ئێوە سەلماندووتانە کە نەورۆز دەتوانێت هۆکارێک بێت بۆ نیشاندانی ئیرادەی ئێوە لە پێناوی بەدەستهێنانی مافی دیاریکردنی چارەنووس، لە پێناوی ژیانێکی ئازاد و یەکسان و بەختەوەرانە بۆ هەموان.
خەڵکی تێکۆشەر و کۆڵنەدەر
هەروەک چۆن دارە بەڕووەکانی زاگرۆس بە ڕەگە قووڵەکانیانەوە لە بەرامبەر ڕەشەباکاندا ڕاوەستاون، ئێوەش بە خەباتی بێ وچانتان لە ماوەی ٤٦ ساڵی ڕابردوودا گڕی بزوتنەوەی شۆڕشگێڕانەی کوردستانتان کڵپە سەندوو ڕاگرتووە، هەر واش بەربەستی زۆرداری دەشکێنن و سەهوڵبەندانی ستەم بە ئاگری خەبات و سەرهەڵدانتان ئەتاوێننەوە. هەر ئاورێکی نەورۆز کە هەڵیدەکەن، خۆرێکی بچووکە لەسەر تاریکییەکان. هەر کچێک کە بە قژی پەرێشان و دەنگ و ئاهەنگی زوڵال و دڵپەزێرەوە هەڵدەپەڕێت، نیشانەی سەرکەوتنی ژیانە بەسەر مەرگدا.
ئەوە لەبیر مەکەن: هیچ ستەمێک بەردەوام نییە، چونکە حەرەکەتیمێژوو، بە قازانجی گەلانێکە کە دانانیشن.
نەورۆزی ئەمساڵ، مژدەبەخشی سبەیەکە کە تێیدا بەڕێوەبردنی شار و گوندەکان نەک بە فەرمانی سەرەوە، بەڵکو بە ژیری بەکۆمەڵ و هەڵبژاردنی جەماوەر دیاری دەکرێت.
کاتێک دەبینین ملیۆنەها کەس لە کوردستان و ناوچەکانی دیکەی ئێراندا، بێ ترس لە سەرکوت، لە شەقامەکاندا کۆدەبنەوە، دەزانین کە ئەمە تەنها سەرەتای ڕێگایە. ئەم وێنەیە، داهاتوو دەخاتە بەردەممان: داهاتوویەک کە تێیدا شۆراکانی جەماوەر و سندووقەکانی دەنگدان، جێگرەوەی چەکەکان دەبن و جەماوەر، نەک لە ڕۆڵی تەماشاکەر، بەڵکو لە پێگەی بڕیاردەرانی سەرەکیدا دەر دەکەون
خەڵکی خەباتکاری کوردستان!
بەهار هات تاکو بیسەلمێنێت کە پاش هەر زستانێک، ژیان دووبارە دەست پێدەکاتەوە و هیچ هێزێک ناتوانێت خۆر لە هەڵهاتن بوەستێنێت .
با ئەمساڵ، ئاگری نەورۆز، سووتێنەری زنجیری زۆرداری بێت و سەوزایی سروشت هێمای شین بوونی هەنگاوە پتەوەکانتان بەرەو ئازادی. بێت با بەهاری ئەم جارەمان پێشەکی بەهاری ئازادی بێ با ساڵی نوێ، ساڵی کۆتایی شەوی تاریک و دەستپێکی بەرەبەیانی دەسەڵاتی جەماوەر بێت.
نەورۆزتان پیرۆز و هەمو رۆژێکتان ، نەورۆز بێت!