له ئه‌نجامی ته‌قینه‌وه‌ی بۆمبێكی چێنراو له ماڵی فه‌رمانده‌ی هێزه‌كانی “ڕاپه‌ڕیوی جه‌ماوه‌ری” له شارستانی “شولگره” له ویلایه‌تی به‌لخ له باكووری ئه‌فغانستان، لاینكه‌م سێ كه‌سی مه‌ده‌نی گیانیان له‌ده‌ستدا و ژماره‌یه‌كیش برینداربوون.
ڕۆژی پێنجشه‌ممه سه‌رۆك پۆلیسی شارستانی شولگره له‌م پێوه‌نده‌دا ڕایگه‌یاند كه سه‌ره‌ڕای گیان له‌ده‌ستدانی سێ كه‌سی مه‌ده‌نی به‌هۆی ئه‌م ته‌قینه‌وه‌یه، ١٥ كه‌سی دیكه‌ش برینداربوون. ئه‌مه له‌كاتێكدایه كه هه‌تا ئێستا هیچ كه‌س یاخود لایه‌نێك به‌رپرسایه‌تی ئه‌م هێرشه‌ی نه‌گرتووه‌ته ئه‌ستۆ. جێگه‌ی ئاماژه‌یه، له ماوه‌ی ١٠ ڕۆژی ڕابردوودا به‌هۆی دوو هێرشی چه‌كدارانه به ده‌یان خوێندكار و دانشجو له ئه‌فغانستان گیانیان له‌ده‌ستداوه و زیاتر له ١٢٠ كه‌سیش برینداربوون. ئه‌م هێرشانه له‌كاتێكدا ڕوویانداوه كه ده‌وڵه‌تی ئه‌فغانستان و هێزه‌كانی تاڵبان له شاری “دۆحه”ی قه‌ته‌ر، سه‌رقاڵی وتووێژی ئاشتین.