بەرپرسی کانوونی ئەنجومەنی سێنفی کرێکاران و وەستاکارانی بیناسازی ئۆستانی كوردستان ڕاگه‌یاندووه: کرێکارانی بیناسازی لە ئۆستانه سنوورییەکان، به‌ر لە هاتنی کۆرۆناش لەگەڵ کێشەی بێکاری بەرەوڕوو بوون، بەڵام ئێستا بێکاری داوێنی ئەو کرێکارانەی گرتووە و زیاتر لە ٦٠ بۆ ٧٠ له‌سه‌دی کرێکارانی بیناسازی لە ساڵی نوێ بێکارن.
ناوبراو ڕاشیگه‌یاند: بە هاتنی کۆرۆنا، بارودۆخەکە خراپتر بووە و کرێکارانی بیناسازی بیمەی بێکاری نایناگرێتەوە و ئەو کرێکارانە سندووقی بیمەی بێکارییان نییە. بەرپرسی ئەنجومەنی سێنفی کرێکاران و وەستاکاران هەروەها ئاماژە بە دۆخی نالەباری کرێکارانی ڕۆژمزد کرد و ڕایگەیاندووه: بە هاتنی کۆرۆنا، سنوورەکان بە تەواوەتی داخراوە و تەنیا لە ناوچەی هەورامانات، ٤ تا ٥ هەزار بنەماڵە کە لە ڕێگای کۆڵبەرییەوە بژیوی ژیانیان دابین دەکەن و بە داخستنی سنوورەکان، ئەو بنەماڵانە هیچ سەرچاوەی داهاتێکیان نییە. ده‌شڵێت: زۆرێک لە کۆڵبەران، زەمانێک کرێکارانی پسپۆڕی بیناسازی بوون، کە بەهۆی بێکاری یان داخرانی یەکەکانی بەرهەمهێنان، ڕوویان لە پیشەی کۆڵبەری کردوووە.