خانەنشینانی تەئمینی ئیجتیماعی لە شارەکانی تاران، ڕەشت، شوش، ئەهواز، کرماشان و چەند شارێکی دیکە، لە ناڕەزایەتی بەرامبەر بە بەرزبوونەوەی هەڵاوسان، دۆخی خراپی گوزەران و جێبەجێنەکردنی داواکارییەکانیان، لەبەردەم فەرمانگەکانی ئەو دەزگایە گردبوونەوە.
خانەنشینە ناڕازییەکان داوای جێبەجێکردنی تەواوی ماددەکانی ٩٦ و ١١١ی یاسای تەئمینی ئیجتیماعی و بەرزکردنەوەی مووچەکانیان هاوتەریب لەگەڵ ڕێژەی هەڵاوسانی ڕاستەقینە و تێچووی سەبەتەی بژێوی دەکەن. هەروەها دابینکردنی خزمەتگوزاریی تەندروستیی بێبەرامبەر و شایستە، هەڵوەشاندنەوەی بیمەی تەندروستیی تەواوکەری بازرگانی، یەکسانکردنی مووچەکان و خەرجکردنی دەستبەجێی سەرجەم مافە دواخراوەکانیان، لە بەشەکانی دیکەی داواکارییەکانیان بوون.