ئێوارەی ڕۆژی سێشەممە، لە سنوری شارەدێی تازە خورماتووی سەر به ئوستانی کەرکوک، لەهێرشێکی چەکدارانی داعشدا ٧ هاوڵاتی گیانیان لەدەستدا و دواتریش شەڕ لەنیوان هێزەکانی حەشدی شەعبی و چەکدارانی داعش هاتەئاراوە.
بەپێی ڕاپۆرتەکان، لەسنوری شارەدێی تازە خورماتوو، حەوت هاوڵاتی سەرقاڵی کاری دروێنەبوون کە چەکدارانی داعش بە ئۆتۆمبێلێکی جۆری پیک ئاب، هێرشیان کردوەتە سەریان و لەئاکامی تەقەی ڕاستەوخۆی ئەو چەکدارانەدا دەستبەجێ ئەو ٧ هاووڵاتییە گیانیان لەدەستداوە. جێگای ئاماژەیە لە لایەکی دیکەوە چەکدارانی داعش شەوی ڕابردوو هەڵیانکوتاوەتە سەر ماڵێکی دانیشتووی گوندی “ئیسڵاحی” سەر بەشارەدێی گوڵاڵەی سەر بە شارۆچکەی خانەقین و تەقەیان لە ئەندامانی ئەو خێزانە کردووە و لە ئاکامدا دوو کەس گیانیان لە دەستداوە کە یەکێکیان ژنێک بووە و چوار کەسی دیکەش بەسەختی بریندار کراون.