دوای بەڕێوەچوونی ڕێوڕەسمی نۆیەمین ساڵیادی خۆسووتاندنی سێ کەس لە چالاکان و پەیڕەوانی ئایینی یارسان لە شاری سەحنە، ژمارەیەک لە چالاکانی پەیڕەوی ئەو ئایینە دەستبەسەر کران کە یەکێکیان “سیاوەش حەیاتی” چالاکی ناسراوی یارسان و وتەبێژی کۆڕی ڕاوێژی چالاکانی یارسانە.
بەپێی ڕاپۆرتەکان، “سیاوەش حەیاتی” دوای ٤ کاتژمێر لێپرسینەوە ئازاد کراوە بەڵام هیچ زانیارییەک لەسەر شوناس و چارەنووسی هاووڵاتییەکانی دیکە لەبەردەستدا نییە. جێگای ئاماژەیە لە کۆتایی بەهار و سەرەتای هاوینی ساڵی ٢٠١٣ی زایینی و پاش ئەوەی بەرپرسانی زیندانی هەمەدان، سووکایەتییان بە یەکێک لە پەیڕەوانی ئایینی یارسان کردبوو، چەندین هاووڵاتیی یارسانی لە بەرامبەر بینای فەرمانداریی هەمەدان و بینای پەرلەمانی ئێران لە تاران خۆیان سووتاند کە سێ کەس لەوان بە ناوەکانی “حەسەن ڕەزەوی، نیکمەرد تاهیری و محەممەد قەنبەری ” بەو هۆیەوە گیانیان لەدەست دا.