دەزگای دادوەریی کۆماری ئیسلامیی ئێران، سزای سێدارەی مەهدی فەرید، یەکێک لە کەسایەتییە سەربازییەکان و بەڕێوەبەرانی پێشووی کۆمیتەی بەرگریی شارستانی کە پێشتر بە تۆمەتی “سیخوڕی بۆ ئیسرائیل” سزای سێدارەی بەسەردا سەپابوو، بەنهێنی لە بەندیخانەی قزڵحەساری کەرەج جێبەجێ کرد.
بەپێی ڕاپۆرتەکان، بەرەبەیانی ڕۆژی چوارشەممە ٢ی گۆڵان سزای سێدارەی بەندکراوێکی سیاسی بە ناوی مەهدی فەرید خەڵکی ئەراک، کە پێشتر هیچ هەواڵێک سەبارەت بە دەستبەسەرکردنی بڵاو نەکرابووەوە، بە شێوەیەکی نهێنی لە بەندیخانەی قزڵحەساری کەرەج جێبەجێ کرا. ئاژانسی هەواڵی “میزان“، زمانحاڵی فەرمیی دەزگای دادوەری، وێڕای بڵاوکردنەوەی ئەم هەواڵە، ئاماژەی بە شوێنی دەستبەسەرکردن و هەروەها شوێنی جێبەجێکردنی سزای سێدارەی ئەم بەندکراوە نەکردووە. شیاوی باسە کە مەهدی فەرید ١١ی جۆزەردان دەستبەسەر و دواتر لەلایەن لقی ٢٦ی دادگای تاران سزای ١٠ ساڵ بەندکرانی بە سەردا سەپابوو. بەڵام ئەو سزایە لەلایەن لقی ٢٣ی دادگاوە گۆڕدرا و بە تۆمەتی سیخوڕێ بۆ ئیسرائیل سزای سێدارەی بەسەردا سەپا