به پێی ڕاپۆرتی ڕێكخراوی مافی مرۆڤی هەنگاو، کۆڵبەرێکی خەڵکی نەوسوود، بە تەقەی ڕاستەوخۆی هێزەكانی ڕژیم لە سنووری ئه‌مشاره كرایه ئامانج و بە سەختی بریندار بوو.
بە پێی ئه‌م ڕاپۆرته، بەرەبەیانی ڕۆژی پێنجشەممە ٢٥ی بەفرانبار، هێزەكانی ڕژیم لە چیاکانی نەوسوود، دەسڕێژیان لە کۆمەڵێک کۆڵبەر کرد و به‌هۆیه‌وه كۆڵبه‌رێكی خەڵکی گوندی “نروێ” سه‌ربه شاری نەوسوود بە ناوی “ئاریا خالیدی” بە سەختی بریندار بوو. شایانی باسه، ناوبراو به‌مه‌به‌ستی چارەسەری پزیشکی گوازراوەتەوە بۆ نه‌خۆشخانه‌یه‌كی شاری کرماشان. جێگه‌ی ئاماژه‌یه، له ماوه‌ی ئه‌مساڵی زایینیدا، لانیکەم ٢٤٠ کۆڵبەر و کاسبکار لە سنوورەکانی کوردستان بوونەتە قوربانی کە ٥٩ کەسیان گیانیان لە دەست داوە و ١٨١ کەسیشیان بریندار بوون.