ڕۆژی چوارشه‌ممه ٢٧ی به‌فرانبار، سپای پاسداران بۆ جارێكی دیكه ناوچه‌یێكی له نزیك شاری كیچ له پاكستان مووشه‌كباران كرد و له وڵامدا ئه‌رته‌شی پاكستان ناوچه‌یێكی له نزیك شارستانی سه‌راوان بۆردوومام كرد كه به‌هۆیه‌وه ٩ كه‌س گیانیان له‌ده‌ستدا.
به‌پێی ڕاپۆرته‌كان، سپای پاسدارن له یه‌كه‌م هێرشی دا بۆ سه‌ر گوندی په‌نجگور بووه‌ته هۆی گیانله‌ده‌ستدانی دوو منداڵ و برینداربوونی شه‌ش كه‌سی دیكه، به‌ڵام له هێرشی دووهه‌م دا بۆ سه‌ر شاره‌كانی كیچ و تۆربه‌ت هیچ زانیارییه‌ك له‌سه‌ر ڕێژه‌ی زیانه‌كان له‌به‌رده‌ستدا نییه. له وڵامدا ئه‌رته‌شی پاكستان ده‌ورووبه‌ری شارستانی سه‌راوانی له قووڵایی ٤٠ بۆ ٥٠ كیلۆمتری خاكی ئێران كرده ئامانج و به‌وهۆیه‌وه دوو پیاو، چوار منداڵ و سێ ژن گیانیان له‌ده‌ستدا. به‌وته‌ی میدیاكانی ڕژیم ٧ شارومه‌ندی به‌لووچی پاكستانی كوژراون، به‌ڵام ده‌وڵه‌تی پاكستان ده‌ڵێت مه‌قه‌ڕی جودایی خوازه‌كانی به‌لووچی كردۆته ئامانج.