ماشینی كوشتاری كۆماری ئیسلامی به‌رده‌وامه و ڕۆژی دووشه‌ممه ١٠ی گوڵان، ٨ به‌ندكراو له زیندانه‌كانی شیراز، ئیسفه‌هان، كه‌هنووج و قائێن ئێعدام كراون.
به‌پێی ڕاپۆرته‌كان، به‌یانی دووشه‌ممه، حوكمی ئێعدامی سێ به‌ندكراو كه ناسناوی یه‌كێكیان بریتی بووه له “دین محه‌ممه‌د شه‌هلی بۆر” به تۆمه‌تی په‌یوه‌ندیدار به مادده‌ی هۆشبه‌ر له زیندانی ئیسفه‌هان جێبه‌جێ كراوه. له‌لایه‌كی دیكه‌وه سێ به‌ندكراو به ناوه‌كانی “حسێن ته‌وانا كودیانی”، “تالب ئه‌كبه‌ری” و “ڕه‌زا مه‌سروور” به تۆمه‌تی كوشتنی به ئه‌نقه‌ست له زیندانی عادل ئابادی شیراز له‌سێداره دراون. له زیندانه‌كانی كه‌هنووج و قائێن دوو به‌ندكراوی دیكه به ناوه‌كانی “محه‌ممه‌د بامری” ته‌مه‌ن ٢٤ ساڵ و “موحسن كه‌ره‌می” ته‌مه‌ن ٢١ ساڵ به تۆمه‌ته‌كانی كوشتنی به ئه‌نقه‌ست و مادده‌ی هۆشبه‌ر ئێعدام كراون.