ڕۆژی دووشه‌ممه ٥ی سه‌رماوه‌زی ١٤٠٣، كوردانی شۆڕشگێڕ له باكووری و ڕۆژئاوای كوردستان، بلژێك، ئیتالیا و ئه‌رمه‌نستان به بۆنه‌ی ٢٥ی نۆڤامبه‌ر ڕژانه سه‌ر شه‌قام و خوازیاری ئازادی شه‌ریفه محه‌ممه‌دی، په‌خشان عه‌زیزی و وریشه مورادی بوون.
به‌پێی ئه‌و وێنانه‌ی له تۆڕه كۆمه‌ڵایه‌تیه‌كان بڵاو كراوه‌ته‌وه، كوردانی شۆڕشگێڕی شاری ئامه‌د پاش قه‌ده‌غه‌كردنی دروشمی ژن،ژیان،ئازادی له‌لایه‌ن ئوستاندار، ڕژانه سه‌ر شه‌قام و به هه‌زاران كه‌س دروشمی بژی به‌رخۆدان و ژن،ژیان،ئازادیان به‌رز كرده‌وه. له شاره‌كانی حه‌له‌ب، شه‌هبا، حه‌سه‌كه، ڕه‌قا، قامیشلوو و كۆبانی خه‌ڵكی ئازادیخوازی ڕۆژئاوای كوردستان، ڕۆژی ٢٥ی نۆڤامبه‌ریان له هه‌موو ژنانی كوردستان و ئێران پیرۆزبایی كرد، به‌شداربووان سه‌پاندنی سزای سێداره به‌سه‌ر په‌خشان عه‌زیزی و وریشه مورادیان به توندی شه‌رمه‌زار كرد و خوازیاری ئازادی هه‌موو به‌ندكراوانی سیاسی له به‌ندیخانه‌كانی كۆماری ئیسلامی بوون. له ئه‌رمه‌نستان، بلژێك و ئیتالیا كوردانی ئازادیخواز و دۆستانیان خۆپێشاندانی گه‌وره‌یان به‌ڕێوه برد و خوازیاری كۆتایی هێنان به سه‌ركوتی ژنان بوون.