بە ناوی کومیتەی گشتیی حیزبی دێموکراتی کوردستانی ئێران لە وڵاتی ئاڵمانەوە یادی ٤٠ ساڵەی دامەزرانی حیزبی کۆمۆنیستی ئێران لە ئێوە بەڕێزان و هەموو ئەندامان و خەباتکارانی حیزبەکەتان پیرۆزبایی دەکەین و ڕێز لە خەبات و قوربانیدانتان لە ماوەی چوار دەیە تێکۆشانی شۆڕشگێڕانە بەرانبەر بە فاشیزم و کۆنەپەرەستی و ستەمکاریی زاڵ بەسەر چارەنووسی گەلانی ئێراندا دەگرین.
گومان لەوەدا نیە کە خەباتی هاوبەش و هەمەلایەنەی خەڵکی کوردستان و هەموو نەتەوە ستەملێکراوەکانی ئێران لە ڕەهەندە جۆراوجۆرەکانەوە پێویستی بە هاوئاهەنگی و ئیرادەی هاوبەش و ڕێکخستنی ئامانجدار و یەکگرتوانەی هەموو هێز و لایەنە خەباتکارەکانی کۆمەڵگای سیاسیی ئێران هەیە و بوونی ئێوە لە گۆڕەپانی خەباتی چالاکانە و ئەزموونە سیاسییەکانی ڕابردووتان و نەخشەڕێگاتان بۆ بنیاتنانی داهاتوو، دەتوانێ گوڕوتینی زیاتر بە ڕەوتی ئەو خەباتە بدات.
حیزبی ئێمە وەکوو پرەنسیپێکی نەگۆڕ و لەمێژینەی خۆی باوەڕی قووڵی بە پێویستیی پتەوترکردنی ئەو هاوخەباتییە هەیە و پێی وایە دەتوانین و دەبێ خاڵە لاواز و بەهێزەکانی پێوەندییەکانمان لە ڕابردوودا بکەینە ئەزموونێک بۆ تێکۆشانی هاوبەشی داهاتوو و هەوێنی یەک هەڵوێستی لە بەردەم ئاڵوگۆڕە چارەنووس سازەکانی داهاتووی کۆمەڵگاکەماندا.
بەڕێزان!
هەروەک دەزانن، لە ماوەی یەک ساڵی ڕابردوودا سەرهەڵدانی جەماوەریی گەلانی ئێران بە پێشەنگایەتیی نەتەوەی کورد و لە ژێر دروشمی “ژن، ژیان، ئازادی”دا تەنگی بە دێوەزمەی دیکتاتۆری و کۆنەپەرەستیی کۆماری ئیسلامی هەڵچنیوە و ڕێژیمی لە هەر دوو ئاستی نێوخۆیی و نێودەوڵەتیدا بەرەوڕووی قەیرانێکی قووڵ و پێکهاتەشکێن کردووە و بۆتە ترووسکەی هیوایەک بۆ ئازادی و ڕزگاری لە دڵی خەڵکی وەزاڵەهاتووی وڵاتەکەماندا.
لەو نێوانەدا، پۆتانسێل و ڕۆڵی بزووتنەوەی سیاسیی شۆڕشگێڕانەی کوردستان و پێگەی سیاسیی و کۆمەڵایەتیی بەهێزی ئەو بزووتنەوە ڕەوایە لە نێو خەڵکدا فاکتەری هەرە شوێندانەر لە هەڵگێرسان و پەلهاوێشتن و پەرەسەندنی شۆڕشی ژینادا بوو. ئەو شانازییە هەروەها بەرهەمی دیسکۆرسی پێشکەوتنخوازانە، قوربانیدان و یەکگرتوویی لایەنەکان لە گوتار و کردەوەدا بوو کە سەرەڕای دڕندایەتیی لەڕادەبەدەری هێزی سەرکوتکەر، تا هەنووکەش ورەی شۆڕش و ڕۆحی بەرەنگاریی لە نێو چین و توێژە جۆراوجۆرەکانی خەڵکدا بە زیندوویی ڕاگرتووە.
حیزبی دێموکراتی کوردستانی ئێران پاراستن و پتەوترکردنی بنەماکانی ئەو هاوپێوەندییە شۆڕشگێڕانەیە لەگەڵ هەموو لایەنەکان بە ئەرکی سەرشانی خۆی دەزانێت و لەو سۆنگەیەوە کە حیزبی کۆمۆنیستی ئێران بە هاوسەنگەر و پشتیوان و هاوخەباتێکی خاوەن ڕابردوو و تەیار بە پرەنسیپی سیاسی دەزانێت، پێداگری لەسەر گرینگیی پەرەپێدانی پێوەندی و دۆستایەتی لەگەڵ حیزبە تێکۆشەرەکەتان دەکات.
لە کۆتاییدا جارێکی دیکە یادی ٤٠ ساڵەی دامەزرانی حیزبی کۆمۆنیستی ئێران بەرز ڕادەگرین و هیوای سەرکەوتنتان لە بەرەوپێشبردنی ئەرکە شۆڕشگێڕییەکانتاندا بۆ دەخوازین.
حیزبی دێموکراتی کوردستانی ئێران
کومیتەی گشتیی ئاڵمان
١٧ی خەرمانانی ١٤٠٢ی هەتاوی
٨ی سێپتامبری ٢٠٢٣ی زایینی