به پێی ڕاپۆرته‌كان، هاووڵاتییەکی دەستبەسەرکراوی ناڕەزایەتییەکانی مانگی خەزەڵوەر لە شاری کرماشان له لایه‌ن دادگای ئه‌مشاره بە ٢ ساڵ زیندانی مەحکووم کرا.
به پێی ئه‌م ڕاپۆرته، لاوێک بە ناوی “ئەمین کاسب” خەڵکی شاری کرماشان، لەلایەن دادگای ڕژیمی ئه‌مشاره بە ٢ ساڵ زیندانیی تەعزیری مەحکووم کرا. ئەو لاوە بە “تێکدانی بیروڕای گشتی و پڕوپاگەندە دژی نیزام لە بەرژەوەندیی یەکێک لە حیزبە نه‌یاره‌كانی دژ به كۆماری ئیسلامی” تۆمەتبار کراوە. شایانی باسه، ناوبراو لە کۆبوونەوە ناڕەزایەتییەکانی شاری جوانڕۆ لە ئاست گرانبوونی بێنزین دەستبەسەر کرا و دواتر پاش تەواوبوونی لێپرسینەوەکەی، ڕێکەوتی ١٨ی بەفرانباری ئەمساڵ، بە دانانی بارمتەی ٢٠٠ ملیۆن تمەنی بە شێوەی کاتی ئازاد کرابوو.