لە ڕۆژانی ڕابردوودا، دوو هاووڵاتی خەڵکی شاری شیراز لە لایەن دەزگای قەزایی ڕژیمەوە حوکمی سێدارەیان بەسەردا سەپێندراوە.
ئەو دوو هاووڵاتییە بە ناوەکانی “مۆجتەبا دەهەنبەندی و کیانوش حەمزەیی کازرونی” لە کاتی ناڕەزایەتییەکانی مانگی بەفرانباری ساڵی ڕابردوودا، یارمەتی چەند ناڕازی بریندراریان کردبوو و بە مەبەستی دەرمانی برینەکانیان، ئەو کەسانەیان بۆ شوێنی کارەکانیان بردووە. بەڵام پاش 8 رۆژ هێزە ئەمنییەکانی ڕژیم ئەو دوو کەسە ئەناسن و دەستبەسەریان دەکەن و دواتر لە لایەن لقی یەکەمی دادگای ئینقلابی شیرازەوە بە تۆمەتی “تێکدانی ئەمنییەتی وڵات، یارمەتیدانی ناڕازیان، ئاگردانی شوێنە گشتییەکان و بێڕێزی بە ئیسلام” حوکمی موحاربەیان بە سەردا سەپێندراوە.