لە رۆژێکەوە کە یەکی مەی رۆژی کرێکار بەسر ڕژیمی سەرمایەداری کۆماری ئیسلامی و یاسا سەدەنێوەڕاستیەکانیدا سەپاوە و ئەم ڕژیمە ناچار بووە داماوانە دان بە گرنگی ئەوەڵی مەیدا بنێ، سەرانی ڕژیم هەموو ساڵێک هەوڵیانداوە تا ئەم بۆنە مێژوویی و جیهانیە لە ناوەرۆکی چینایەتی و شۆڕشگێڕانەی بەتاڵ بکەن. ڕژیم هەموساڵێک لە هەوڵدا بووە تا لە ڕێگای کۆبوونەوەی فەرمایشیەوە، رۆژی جیهانی کرێکار بکاتە مەڕاسمێک بۆ حەماقەت و ترس و سوکایەتی به جەماوەری کریکاران. ڕژیم بە شێوەیەکی فریوکارانە، بە جێگای رۆژی کرێکار، حەفتەی کرێکاری دیاری کردووه. بە پێی ئەم حیلە گەرییە حەفتەی کرێکار هەموو ساڵێک لە حەفتەیەک بەر لە رۆژی یەکی مەیەوە دەست پێدەکات و دەگاتە کۆتایی. بە پێی ڕاپۆرتی هەواڵنێریی حکومەتی مێهر، ” حەفتەی کرێکاری ئەمساڵ لە رۆژی پێنجشەممە بەرابەر بە پێنجی گوڵانەوە دەستی پێکردوە و تا رۆژی سێ شەممەی حەتوی داهاتوو ١١ ی مانگی گوڵان درێژەی دەبێت”. بەپێی سیناریۆ ی ئامادە کراو کرێکاران دەبێ لە رۆژی یەکەمی ئەم حەفتەیەدا لەگەڵ ئاڕمانەکانی خومەینی و وەلی فەقیە پەیمان تازە بکەنەوە و پشتیوانی لە کالای ئێرانی بکەن، لە رۆژی دووهەمدا بچن بۆ بینینی مەڕاجعی عوزام، لە رۆژی سێهەمدا لە نوێژی هیەینی دا بەشداری بکەن و لە رۆژەکانی دواتریشدا لەگەڵ روحانی و خامنەیی چاوپێکەوتنیان هەبێت و سەرئەنجام لە رۆژی ١١ ی گوڵاندا لە مەڕاسمە فەرمایشی و زەردە دەوڵەتیەکاندا بەشداری بکەن.
بەپێی ئەم سیناریۆ دزێوە، سەران و کاربەدەستانی ڕژیم لە هەموو ماوەی ئەو ٦ رۆژەدا لە ڕێگای تەشەکول و ناوەندە زەردە دەوڵەتیەکانەوە بۆ بەڕیوەبردنی مەڕاسمی جیی سەرنجی ڕژیم و خاوەنکاران زەمینە چینی دەکرێت تا لە رۆژی حەوتەمدا ئیتر هیچ نیشانەیەک لە خەباتکاری، لە ناڕەزایەتی و لە پێشکەوتن خوازی بە سیمای ڕێ و ڕەسمەکانەوە دیار نەبێت. ڕژیمی کۆماری ئیسلامی کە لە ئاکامی خەباتی کرێکاران و پێداگریی هەڵسوڕاوان و پێشڕەوانی بزوتنەوەی کرێکاریدا سەبارەت بە زیندو ڕاگرتنی سوننەتەکانی بەڕێوەچوونی مەراسمی یەکی مەی پاشەکشەی کرد و ئەم رۆژە مێژووییەی بە ڕسمیەت ناسیوە، بەڵام لە هەمان حاڵدا هەوڵ ئەدات تا لەم پاشەکشەیە بۆ خەوشدار کردنی لایەنی چینایتی یەکی مەی کەڵ وەربگرێت. ڕژیم بە گوڕینی ماهیەتی چینایەتی رۆژی جیهانی کرێکار و بوونی بە رۆژی ناڕەزایەتی و هاوپشتی نێونەتەوەیی کرێکاران لەدژی جیهانی سەرمایەداری، بە حەفتەی کرێکار و نمایشی قێزەونی تازە کردنەوەی پەیمان لەگەڵ ئاڕمانەکانی کۆماری ئیسلامی سوکایەتی بە کرێکاران دەکات. لەم روەوە دەبێ بۆ بایکوتی لێبڕاوانەی، ئەم کۆبوونەوە دژی کرێکاریانە ئامادە بین.
بەڕێوەبردنی مەڕاسم و کۆبوونەوە کرێکاریە سەربەخۆکان لە دەوڵەت لە رۆژی یەکی مەیدا، و بایکوت و تەحریمی لێبڕاوانەی کۆبوونەوە زەرد و فەرمایشیەکان، یەکێک لە مێحوەرەکانی بانگەوازی ئێمەیە بۆ زیندو ڕاگرتن و ڕێز گرتن لەم سوننەتە چینایەتی نێونەتەوەییە کرێکارییە. ئەویکە ئەم بانگەوازە لە لایەن بڕیار دەرانیەوە چ شێوازێکی دیاریکراوی دەبێت و بەکردەوە دەردێت، بابەتێکە کە تا رادەیەکی زۆر گرێدراوی بارودۆخی دیاری کراوی هەر شوێن و ناوچە و کارخانەیه‌كه و رادەی ئامادەیی تەشکیلاتی و پێوەندی خەباتکارانە لەنێو پێشڕەوان و هەڵسوڕاوانی بزوتنەوەی کارێکارییە. لەم بوارەدا جەخت دەکەینەوە له‌سه‌ر بانگەواز کردن لە سەرجەم کرێکاران کە لە رۆژی یەکی مەی بەرابەر لەگەڵ ١١ی گوڵان كه نەچن بۆ کارخانە و شوێنی کار و لە هەمان حاڵدا هەوڵ بدەن کۆبونەوە و ئاکسیۆنەکانی یەکی مەی بەشێوەی هاوئاهەنگ و سەرتاسەری، بەڕیوەبەرن.
بزوتنەوەی کرێکاری ئێران بەپێی ئەزمون و سوننەتی ساڵەکانی ڕابردو لە رۆژی یەکی مەی لە قەتعنامەکانی خۆیدا لەسەر متالباتێک پێداگری دەکەن کە نە تەنیا داخوازیه مێحوەرییه‌كانی چینی کرێکاری ئێران دەگرێتەوە، بەڵکو هەنووکەیی ترین داواکاری بزوتنەوە کۆمەلایەتی و ناڕەزایەتی پێشڕه‌و لە کۆمەڵگەشدا دەگرێتەوە. کرێکارانی ئێران لەم رۆژەدا لەسەر داخوازی زیاد کرانی حەقدەستی گونجاو لەگەڵ دابین بوونی ژیانێکی ئینسانی، دابین بوونی بیمەی بێکاری کافی بۆ سەرجەم کەسانی ئامادەی کار، هەڵوەشاندنەوەی کاری مندالان، ئازادی بەیان، ئازادی تەشەکول، تەحەزوب، مانگرتن، ئازادی قەڵەم، ئازادی سەرجەم زیندانیانی سیاسی و کۆتایی هێنان بە سزای ئێعدام، كۆتایی هێنان بە هەڵواردنی ڕەگەزی لەدژی ژنان و دابین بوونی یەکسانی ژن و پیاو لە سەرجەم بوارەکانی ژیانی ئابووری، کۆمەڵایەتی و سیاسی جەخت دەکەنەوە. کرێکاران لەم رۆژەدا بە جەخت کردنەوە لەسەر ئەم داوکاریانە، عەزمی لێبراوانەی خۆیان لە خەبات بۆ دابین بوونی ئازادیە دیمەکراتیکەکان لە کۆمەڵگادا رادەگەیەنن. جەخت کردنەوە لەسەر ئازادی بەیان و تەحزوب و ئازادی پیکهێنانی تەشەکولی کرێکاری و داخوازی ئازادی زیندانیانی سیاسی بەشێکە لە داواکاری ئازادی بێ شەرت و مەرجی سیاسی. تەرح کردنی ئەم داخوازیانە بەم واتایەیە کە هەڵسوڕاوان و ڕێبەرانی بزوتنەوەی کرێکاری ئاگاداری پێگەی خەبات و نه‌خشی مێژوویی چینی کرێکار و وشیاربوون لە دەستەبەر کردنی ئه‌م داخوازیانه دایه. چینی کرێکار ئەو زەرفیەتەی هەیە کە بە پشت بەستن بە هێزی خۆی لە پێشەوەی ڕیزی جەماوەری زەحمەتکێش و بێبەش و ستەم دیتودا، کۆمەڵگا بەرەو ئالوگۆڕی شۆڕشگێرانە بەرێت.
جەخت کردنەوە لەسەر داخوازی ” زیندانیانی سیاسی دەبێ ئازاد بکرێن”، بەم واتایەیە کە هیچ کەس نابێ لەبەر خاتری هەڵسورانە سیاسیەکەی، بە هۆی مەرام و بیرو بۆچوونی سیاسی ولەبەر دەربڕینی دژایەتی و لەبەر خەبات لەدژی بۆرژوازی حاکم زیندانی بکرێت. بەم واتایەیە کە کرێکاران خۆیان لە ڕیزی پێشەوەی خەڵکی ئازادی خوازدا هێزی گەورەی چینایەتیان بۆ دابین بوون و زەمانەتی ئازادی و چالاکییە سیاسییەکان و یەگرتوو کردنی ڕیزی خەباتی شۆڕشگێرانە بەسیج دەکەن.
داخوازی بیمەی بێکاری گونجاو لەگەڵ دابین بوونی ژیانێکی ئینسانی، ئازادی بەیان و تەشەکول و پێداگری کردن لەسەر مافە ئینسانیەکانی هەموو کەسێک بۆ بەهرەمەند بوون لە ژیانیکی ئازاد و ئینسانی، خۆی شاهیدی ناڕەزایەتی و حەرەکەتی چینی کرێکارە لەدژی دۆزەخیک کە ڕژیمی ئیسلامی بەرپای کردوە، چینی کرێکار لە رۆژی یەکی مەیدا بە بەرز کردنەوەی ئالای ئەم داخوازیانە عەزمی خۆیان بۆ کۆتایی هێنان بەم هەژاری و فەلاکەتە ئابووریی و بێ مافییە سیاسیانە پیشان ئەدەن.