كرێكارانی كارخانه‌ی سه‌به‌لان پارچه‌ی شاری ئه‌رده‌بیل ڕۆژی سێشه‌ممه ١٤ی پووشپه‌ڕ، له ناڕه‌زایه‌تی به نه‌گڕانه‌وه‌ی ژماره‌یه‌ك له كرێكارانی ده‌ركراوی ئه‌و كارخانه‌یه ده‌ستیان له كار كێشایه‌وه و له شوێنی كاره‌كانیان كۆ بوونه‌وه.
به‌وته‌ی نوێنه‌ری كرێكارانی ناڕازی، دۆخی كرێكارانی ده‌ركراوی ئه‌و كارخانه‌یه به تێپه‌ڕبوونی ٤٥ ڕۆژ له ده‌ستپێكردنه‌وه‌ی كار و چالاكییه‌كانی ئه‌و كارخانه‌یه هێشتا به ناڕوونی ماوه‌ته‌وه و نه‌گڕاونه‌ته‌وه سه‌ر كاره‌كانیان. جێگای ئاماژه‌یه له مانگی خاكه‌لێوه‌ی ئه‌مساڵ ئه‌و كارخانه‌یه داخرا و به‌هۆی چه‌ندین جار ناڕه‌زایه‌تی ده‌ربڕین له لایه‌ن كرێكارانه‌وه، دیسانه‌وه ئه‌و كارخانه‌یه كاره‌كانی ده‌ستپێكرده‌وه. شایانی باسه له كاتی ده‌ستپێكردنه‌وه‌ی كاری ئه‌و كارخانه‌یه هه‌تا ئێستا ٢٨٠ كرێكار چاره‌نووسی كاركردنیان به ناڕوونی ماوه‌ته‌وه و پێیان ڕانه‌گه‌یێندراوه بگه‌ڕێنه‌وه سه‌ر كاره‌كانیان.