وێڕای تێپەڕبوونی حەفتەیەک بەسەر دەستبەسەرکردنی سەرەڕۆیانەی “ئەمیر یۆسفی” هاووڵاتییەکی کوردی خەڵکی بۆکان، هێشتا هیچ زانیارییەک سەبارەت بە چارەنووس و دۆخی جەستەیی لەبەردەستدا نییە.
سەرچاوەیەکی ئاگادار وێڕای پشتڕاستکردنەوەی ئەم هەواڵە ڕایگەیاند کە ناوبراو لە مافی دەستڕاگەیشتن بە پارێزەر، چاوپێکەوتن و پەیوەندیی تەلەفۆنی لەگەڵ بنەماڵەکەیدا بێبەش کراوە. “ئەمیر یۆسفی” خەڵکی گوندی “سڵامەت” سەر بە شارستانی بۆکان لە پارێزگای ئازەربایجانی ڕۆژاوایە، کە لەلایەن هێزە ئەمنییەکانی ئیتلاعاتی سپاوە و بەبێ نیشاندانی حوکمی دادوەری دەستبەسەر کراوە و بۆ یەکێک لە ناوەندە ئەمنییەکانی ورمێ ڕاگوێزراوە. تا کاتی بڵاوبوونەوەی ئەم هەواڵە، سەبارەت بە هۆکارەکانی دەستبەسەرکردنی ئەم کەسە زانیارییەک لەبەردەستدا نییە و دامەزراوە ئەمنییەکانیش لەمبارەیەوە هیچ ڕوونکردنەوەیەکیان نەداوە.