بەپێی دوایین هەواڵەکان، بارەگای حیزبی کۆمەڵەی شۆڕشگێڕی زەحمەتکێشانی کوردستانی ئێران لە ناوچەی زڕگوێزەڵە لە هەرێمی کوردستان بووەتە ئامانجی هێرشێکی مووشەکیی لەلایەن کۆماری ئیسلامییەوە.
بەپێی زانیارییە بڵاوکراوەکان، ئەم هێرشە لە شەوی یەکشەممە ٢٤ی ڕەشەمە ڕوویداوە و لانیکەم چوار مووشەک بەرەو ناوچەی بارەگاکە هاویشتراون. بەپێی ڕاپۆرتە سەرەتاییەکان، مووشەکەکان لە ناوچە سنوورییەکانی باشووری ڕۆژهەڵاتی کوردستانەوە هاویشتراون و لە دەوروبەری بارەگاکە کەوتوونەتە خوار. پاش ئەم ڕووداوە هێزەکانی پاراستن و دەستەکانی پزیشکی بە مەبەستی هەڵسەنگاندنی دۆخی زیانەکان و یارمەتیدانی ئەوانەی کە ئەگەری برینداربوونیان هەبوو ڕەوانەی شوێنی هێرشەکە کراون. شایانی باسە کە تا کاتی داڕشتنی ئەم هەواڵە زانیارییەکی ورد سەبارەت بە ئەگەری برینداربوونی پێشمەرگەکان یان ڕادەی زیانە ماددیەکان بڵاونەکراوەتەوە.