ڕۆژی هه‌ینی ٧ی خه‌رمانان، به سه‌دان كه‌س له خه‌ڵكی شاری سنه به بانگهێشتی “كومیته‌ی پشتیوانی له موعه‌لیمانی له سه‌ر كار ده‌ركراو“، له ڕێپێوانێك به‌ره‌وه‌ر چیای ئاویه‌ر كۆبوونه‌وه.
به‌شداربووانی ئه‌و ڕێپێوانه به وتنه‌وه‌ی درووشم و هه‌ڵكردنی پلاكارد دژ به سه‌پاندنی حوكمی “له سه‌ر كار ده‌ركردن، دوورخستنه‌وه” به سه‌ر موعه‌لیمانی كورد ڕاوه‌ستان و خوازیاری هه‌ڵوه‌شاندنه‌وه‌ی ئه‌و حوكمه نایاساییه بوون. ئه‌م ڕێپێوانه له پاركی كوده‌كی شاری سنه‌وه تاكوو بناری چیای قه‌ندیل درێژه‌ی هه‌بوو و هێمای پشتیوانی به‌ربڵاوی كۆمه‌ڵگای مه‌ده‌نی كوردستان له موعه‌لیمانی كورد له به‌رامبه‌ری سیاسه‌ته سه‌ركوتگه‌رانه‌كانی ڕژیمی كۆماری ئیسلامی دژ به موعه‌لیمان بوو. جێگای ئاماژه‌یه هاوكات ئه‌نجومه‌نی سنفی موعه‌لیمانی كوردستان له سه‌قز و زیویه به بڵاو كردنه‌وه و خوێندنه‌وه‌ی به‌یاننامه‌یه‌ك پشتیوانی خۆیان له “موعه‌لیمانی له سه‌ر كار ده‌ركراو” و هه‌روه‌ها “ڕێپێوانی خه‌ڵك له شاری سنه” ده‌ربڕی و خوازیاری هه‌ڵوه‌شاندنه‌وه‌ی ئه‌و حوكمه بوون.