ڕۆژی دووشه‌ممه ٢ی ڕه‌زبه‌ری ١٤٠٣، بنه‌ماڵه‌ی كرێكارانی گیانبه‌ختكردوو له ڕووداوی ته‌قینه‌وه له مه‌عده‌نی به‌ردی خه‌ڵۆزی ته‌به‌س بۆ وه‌رگرتنی ته‌رمی ئازیزانیان و وه‌ده‌ست هێنانی زانیاری له‌سه‌ر چاره‌نووسی كرێكارانی گێرخواردوو له ژێر داروپه‌ردوودا كۆبوونه‌وه.
به‌پێی زانیارییه‌كان، له ڕووداوی ته‌قینه‌وه‌ی مه‌عده‌نی به‌ردی خه‌ڵۆزی ته‌به‌س، ٥٣ كرێكار گیانیان له‌ده‌ست داوه و ٢٠ كه‌سی دیكه‌ش بریندار بوون. به وته‌ی به‌رپرسانی فریاگوزاری خێرای ته‌به‌س، ته‌رمی ٣٨ كرێكار ده‌رهێندراوه و گه‌ڕان به‌دوای ته‌رمی كرێكارانی دیكه یان ڕزگاركردنی ئیحتمالی كرێكارانی گیرخوادوو به‌رده‌وامه. ڕۆژی دووشه‌ممه، بنه‌ماڵه‌ی قوربانیانی له‌به‌رده‌م ده‌رگای مه‌عده‌ن دا كۆبوونه‌وه و دژبه كه‌مته‌رخه‌می و بایه‌خ نه‌دانی به‌رپرسانی ڕژیم به گیانی كرێكاران دروشمیان به‌رز كرده‌وه. له هه‌واڵێكی دیكه‌دا، هێزه ئه‌منیه‌تیه‌كانی ڕژیم ڕێگه‌یان به هه‌واڵنێران به تایبه‌ت هه‌واڵنێرانی ژن نه‌داوه له ته‌رمی گیانبه‌ختكردووان و شوێنی ڕووداوه‌كه نزیك ببنه‌وه.