ڕۆژی هەینی، ١٧ی خەرمانانی ١٤٠٢، کاسبکارێكی خه‌ڵكی گوندی “پیرباوه”ی سه‌ر به شاری جوانڕۆ بە ناوی “پوویا بابایی” تەمەن ٢٦ سال، دوای حەفتەیەک ئه‌شكه‌نجه‌دان و به‌سته‌ری بوون لە نەخۆشخانەیەکی کرماشان، بەهۆی شكانی بڕبڕه‌ی پشت و له‌كاركه‌وتنی مێشكی گیانی له ده‌ستدا.
به‌پێی زانیارییه‌كان، “پوویا بابایی” حەفتەی ڕابردوو لە نزیک شاری “حومەیل”ی سه‌ر به پارێزگای کرماشان، لە کاتێکدا کە هیچ جۆرە بارێکی پێ نه‌بووه و بەرەو شارەکانی باشووری ئێران دەچوو، هێزه حکوومەتییەکان تەقەیان لە تایەری ئۆتۆمبێلەکەی کردووە و پاش ڕاگیرانی ناوبراو، بە شێوەیەکی وه‌حشیانه دەستبەسەریان کردووە و پاش گواستنه‌وه‌ی بۆ گرتووخانه ئه‌شكه‌نجه‌یان داوه. ناوبراو به هۆی لێدانی زۆر، بڕبڕه‌ی پشتی شكا و زه‌ربه مه‌غزی بوو و پاش چه‌ند ڕۆژ به‌سته‌ری بوون له نه‌خۆشخانه‌یه‌كی كرماشان گیانی له ده‌ست دا. جێگای ئاماژه‌یه كه هاوژینی ئه‌و كاسبكاره پاش بیستنی هه‌واڵی گیان له‌ده‌ستدانی هاوسه‌ره‌كه‌ی، باری ته‌ندرووستی تێكچووه و ڕاگوێزی نه‌خۆشخانه كراوه، هه‌روه‌ها ئیداره‌ی ئیتلاعاتی جوانڕۆ گوشاری بۆ بنه‌ماڵه‌ی پوویا هێناوه بۆ ئه‌وه‌ی هه‌واڵی كوژرانی كوره‌كه‌یان میدیایی نه‌كه‌ن و مه‌راسمی پرسه و سه‌ره‌خشی بۆ نه‌گرن.