ڕۆژی سێشه‌ممه ٧ی مانگی خه‌زه‌ڵوه‌ر، له ١٣مین ڕۆژی خۆپیشاندانه‌كان له لوبنان، هێزه‌كانی لایه‌نگری حیزبوڵڵای لوبنان و بزووتنه‌وه‌ی “ئه‌مه‌ل” له ناوه‌ندی به‌یرووت هێرشیان كرده سه‌ر ناڕازییان.
ڕاپۆرته‌كان له لوبنان باس له‌وه ده‌كه‌ن كه به ده‌یان كه‌س له هێزه‌كانی لایه‌نگری حیزبوڵڵای لوبنان و بزووتنه‌وه‌ی “ئه‌مه‌ل” ڕۆژی سێشه‌ممه هێرشیان كردووه‌ته سه‌ر خۆپیشانده‌ران كه له مه‌یدانه‌كانی “شوهه‌دا و ریازلسولح” خێوه‌ته‌یان هه‌ڵدابوو و له‌گه‌ڵیان تێكهه‌ڵچوون. پێشتریش تێكهه‌ڵچوون له نێوان ناڕازییان و لایه‌نگرانی حیزبوڵڵای لوبنان هاتبووه ئاراوه. شایانی باسه، به‌دوای تێپه‌ڕبوونی دوو حه‌فته به‌سه‌ر خۆپیشاندانه‌كان له لوبنان، هه‌ندێ له ڕێگاكان له لایه‌ن خۆپیشانده‌رانه‌وه به‌ستراوه. خۆپیشاندانه‌كانی لوبنان كه له ڕێكه‌وتی ٢٥ی مانگی ڕه‌زبه‌ره‌وه له ناڕه‌زایه‌تیی به وه‌ر‌گرتنی ماڵیات ده‌ستی پێكردووه، سه‌ره‌ڕای هه‌ڵوه‌شاندنه‌وه‌ی ئه‌م گه‌ڵاڵه‌یه و پێشكه‌ش كردنی به‌سته‌ی چاكسازیی خێرا له لایه‌ن ده‌وڵه‌ت له حه‌فته‌ی ڕابردوو، هه‌روا به‌رده‌وامه و ناڕازییان خوازیاری گۆڕینی كولییه‌تی ده‌سه‌ڵات و ده‌ست له‌كار كێشانه‌وه‌ی سیاسه‌تمه‌داران له ده‌سه‌ڵات بوون و ئه‌وان به گه‌نده‌ڵ ناو ده‌به‌ن.